Shillong, ïaïong, 16: Kum ka jingïashim bynta lang bad ki Khristan ha ka pyrthei baroh kawei, ki khynnah kiba wan na ki longing baduk kiba ju ïoh jinghikai na ka SPARK, ha ka sngi Thohdieng ki la rakhe ïa ka Sngi Thohdieng Bakhuid kaba dei ruh ka sngi kaba u Jisu u la shah ïap halor ka Diengphna ban siewspah ïa ka pop jong u khun bynriew ha sla pyrthei.
Ha u kyrwoh ba la phah da ka President jong ka SPARK ka Shima Modak, ka la ong, “wat hapdeng ka jingshah lynshop ïa ka jingpang khlam COVID-19, kine ki khynnah rit ki la dem hakmat u Trai Kynrad ban kyrpad ïa U ba Un beh noh sha jngai ïa ka khlam jingpang bad ban ïada ïa iwei pat iwei bad pan ruh ka jingkyrkhu na u Blei uba Un thehsei ïa ki jingkyrkhu ha manla iwei pa iwei.”
Ka long ka khyllipmat kaba myllung haduh katta katta ban ïohi ïa kine ki heprit ba kin wan shakhmat ban ïashim bynta ha ki jingduwai hakhmat u Trai Kynrad bad ban ïakren bad u Blei lyngba ki jingduwai.
Ha kum kine ki sngi khraw bad ki sngi kyrpang ka SPARK ka ju trei shitom ban lum lang ïa baroh ki khynnah kiba wan na ki longing kiba duk ba kyrduh ban ïakynduh lang kum shi ing shi sem.
