Rakhe ki District ka Meghalaya ïa ka jingïoh laitluid kaba 78 snem jong ka ri India

Jowai: Kumba long lem ha baroh shityllup ka Ri India, ha Jowai la rakhe ïa ka sngi ïoh jinglaitluid ba 78th snem ne ka “78th Independence Day Celebration, 2024” ha kane ka 15 tarik Nailar ha madan Jrisaleiñ bad ïa ka lama lai rong jong ka Ri la pynher da u A. T. Mondal u myntri ba dei peit ïa ka tnad bording.
La ïoh ruh ïa ka jingïaid March Past bala shim bynta da ki 32 tylli ki Contingents kynthup naduh ki pulit bad ki khynnah skul, la don ruh ki jingshad, ki rwai tynrai bad kiwei kiwei de.
Ha kane ka sngi u myntri ula sam ruh ïa ki khusnam sha ki nongjop ha ka jingïaid March Past ïa ka nam ba nyngkong la ïoh rah da ka JNV Mukhla Higher Secondary School, Mukhla, ba ar ka Jowai Public School bad ba lai ka Lathadlaboh Higher Secondary School.
La sam ruh ïa ki khusnam sha ki Village Health Council (VHCs) na ka bynta u snem 2023-2024. Hapoh ka Amlarem C&RD Block la ïoh da ka Lamin Health Center kaba la lah ban pyntreikam bha katkum ka Chief Ministers Safe motherhood Scheme’(CM-SMS), nangta ka Laskeiñ Block Chutwakhu Sarhen Village Council bad ka Thadlaskein Block Sahamuswang Village Health Council.
Kiba ïoh ïaka nam Best Performing Health Facilities ki long ka Loomkywiang UPHC, Thadlaskeiñ Block Sahsniang PHC, Laskeiñ Block bad ka Dawki PHC, Amlarem Block halor ka jinglah jong ki ban ai jingtip ban pynduna ïa ka jingïoh khun.
Ka jingrakhe ïa ka sngi ïohlaitluid ka ri ha Jowai kala long kaba iphuh ipheng bha, da ka jingwan sakhi lang jong ki paidbah nongshnong shnong.
Ïa kane ka juh ka jingrakhe ïoh laidluid la pynlong ha Amlarem Civil Sub Division ha madan Amlarem Subdivision Sport Association Mini Stadium, Ladjaplem, ha kaba u Timothy D Shira ula long u kongsan bad ha Hima Shangpung – Laskeiñ C&RD Block la pynlong ha madan Hula Playground Moosyiem, Shangpung, ha kaba ka kong Santa Mary Shylla (MLA) kala long ka kongsan.
Khliehriat:: Ha ryngkat lang bad ka ri India hi baroh kawei, ha Khliehriat East Jaiñtia Hills District ruh la rakhe ïaka sngi laitluid ka ri India kaba 78 ha kaba ïaka prokram la pynlong ha madan jong ka Khliehriat Higher Secondary School bad u Symbudmyntri rangbah ka jylla, u bah Sñiawbhalang Dhar u la wan ban pynher ïaka lama lai rong jong ka ri bad shim ruh ïa ka Rashtriya Salute jong ka parade jong ki 28 tylli kiba kynthup ruh ka Meghalaya Police, Home Guards &Civil Defence, NCC, Scouts & Guides bad ki khynnah skul.
Ha kane ka sngi ba rakhe ïa ka sngi laitluid ka ri la sam ruh ïa ki prize sha kito kiba jop ha ka jingshad tynrai ha kaba ka Khaddum Cultural Troupe ka la ioh ïaka nam lahduh, ka KB Memorial Secondary School, Wapung ka la wan ba ar bad ka Oxford Secondary School, Ladrymbai ka wan ba lai.
ïa ki Prizes la sam ruh sha ki kynhun kiba jop ha ka March Past ha kaba ka skul Oxford Secondary School, Ladrymbai ka la ioh ïaka nam lah duh, katba ka skul JNV (Girls), Rymbai ka la wan ba ar.
Ha katei ka sngi ka la don ruh ka jingialehkai football (friendly football match) ba la ïakhun hapdeng ka kynhun jong ki heh sorkar bad ki nonghikai skul na East Jaiñtia Hills District ba la pynlong ha madan fotball ha Diengshynrum, la don ruh ka jingai sngewbha sha ki Shelter Homes kiba don ha Khliehriat bad ha ka 7Tyndai Child Care Counseling Centre, Tuber Kmaishnong.
Mawkyrwat: Kum shibynta ban ïasnohktilang ha ka jingrakhe ïa ka sngi ïoh laitluid jong ka Ri India ne ka 78th Independence Day jong u snem 2024, ka South West Khasi Hills District ha ka 15 tarik u ‘Nailar, 2024 ka la ïoh ban ïa kane ka sngi kyrpang ha kaba u bah Sanbor Shulai, MLA jong ka South Shillong Consti-tuency ka u la shim ïa ka bynta ban pynher ruh ïa ka lama lai rong jong ka Ri India bad uba la shim ruh ïa ka rashtria salute jong ki khynnah skul ha madan jong ka Nativity Higher Secondary School, Mawkyrwat.
Ha kane ka 78th Independence Day 2024 la wan ïashimbynta da ki 9 tylli ki skul bad kynthup ïa ki Pulit bad ki NCC na ka Sngap Syiem College, Mawkyrwat ha kaba ka Nativity Higher Secondary School, Mawkyrwat ka la long ka nongjop, ka Jingïaseng Kynthei Mawkyrwat Presbytery Higher Secondary School, Mawkyrwat ha ka kyrdan ba ar bad ka Rising Secondary School, Sohkhyllam ha ka kyrdan ba lai.
Ki Skul kiba la ïashimbynta ha ka cultural program ki long ka Modern Academy Higher Secondary, Rangmaw, ka Saiñjingtip Multipurpose Secondary School, Mawlangwir, ka JNV, South West Khasi Hills District, ka Mawkyrwat Presbyterian Secondary School, Laitlawsang bad ïa ki la sam ruh ka syrnod jong ka jingïashimbynta.
Shuh shuh la sam ruh ïa ka Best Performance ASHA jong ka Mawkyrwat Block sha ka Hundamerry Syiemlieh bad ka Best Performance Village Health Council (VHC) jong ka Mawkyrwat Block kata sha ka shnong Mawlangwir bad shnong Mawthynrew.
Ha kane ka sngi kyrpang la wan ïa shimbynta naduh u bah B. Mawlong, IAS, Deputy Commissioner ka South West Khasi Hills District, u bah G.D. Kharwanlang, IPS, Superintendent jong ki Pulit ka South West Khasi Hills District lem bad ki ophisar na ki tnad treikam bapher bapher jong ka Mawkyrwat Block.
Ranikor Civil Sub Division: U bah Renikton Lyngdoh Tongkhar, MLA ka Mawkyrwat Constituency ula shim ban pynher ïa ka lama da u bad shim ruh ïa ka rashtria salute jong ki 10 tylli ki skul bad kawei ka kynhun jong ki Pulit kiba hapoh ka Ranikor R&RD Block hapoh ka madan jong ka Nolikata.
Ha ka March Pass la jop da ka Nolikata Higher Secondary School, Nolikata, ba ar ka Jingaiti Secondary School, Nonghyllam bad ba lai ka St. John School. Nangta, la sam ruh ïa ki khusnam sah kiba ïoh Best Performance AHSA sha ka Hasina Marak, CHC Ranikor bad Best Performance Village Health Council sha ka Shnong Nongkdait B.
Katba ha ka Cultural Program la wan ïashimbynta da ki saw tylli ki Village Organisation (VO) bad da ki ar tylli ki skul ka Indira Gandhi Memorial Secondary School bad ka Alekwareng Primary School.
Nongstoiñ: Ha West Khasi Hills ki bor synshar bad ki paitbah ki la rakhe ïa ka lyngkhuh sngi Laitluid da ka mynsiem kaba shitrhem bad ka mynsiem ieid ri. Ki paidbah na jngai bad najan jong ka distrik ki la wan sakhi ïa kane ka sngi kyrpang jong ka Ri, ha madan ïalehkai jong ka skul St. Peter’s Higher Secondary School, Nongstoiñ.
La pynher ïa ka lama Lai Rong jong ka Ri ha kaba u Bah Paul Lyngdoh, Myntri ka Sorkar u la long u Kongsan. La bud pat sa da ka jingrwai ieid Ri (National Anthem), ha kaba u la shim ruh ïa ka Rashtrya salute na ka bynta ki 26 tylli ki parade contingent kaba kynthup ïa ki pulit, home guard, NCC, scout and guide bad ki khynnah skul.
Kiwei pat ki prokram ha kane ka sngi ki kynthup ïa ka cultural programme, ka jingsam khusnam ïa ki best Asha District and Block award sha ka kong T.Nongsiej bad kong H Jyndiang, best VHC sha ka Mawrynñiaw VHC, best march pass ba la rah da ka St Peter Higher Secondary School bad Nongstoiñ Public School, Independence Day Run shynrang sha u B.Wanniang, P.Rngaid and S.Puwein ha ka kyrdan ba nyngkong ba ar bad ba lai bad na ka liang ki kynthei sha I kong Pynhunlang Puweiñ, Inocensia Tympuiñ bad Iutifull Tympuiñ.
La pynkut ïa ka prokram ha kane ka sngi da ka jingsam ïa ki packet jingbam sha ka Green Pasteur Orphanage, Pyndengrei, S. Wollington Children’s Home, Nongpyndeng & Shelter Homes for Boys and Girls, Nondeiñ New Nongstoiñ.
Mairang: U Bah Kyrmen Shylla, Myntri ka Sorkar u la pynher ïa ka lama lai rong jong ka Ri India bad u la shim ruh ïa ka salute na ka bynta ki 10 tylli ki parade contingents kiba kynthup ïa ki pulit, home guard, NCC, scout and guide bad ki khynnah skul ha madan ïalehkai jong ka shnong Dommawlum, Pyndeng-umiong Mairang.
Kiwei kiwei pat ki jingpynbyrngia ha kane ka sngi, ki kynthup ïa ka cultural programme bad la pynkut ïa ka prokram ha kane ka sngi da ka jingsam ïa ki khusnam.
Ha Mawshynrut Civil Sub Division, u Bah Methodius Dkhar, MLA ka Mawshynrut Constituency u ba dei ruh u Chairman jong ka Meghalaya Transport ka Jylla, u la pynher ïa ka lama jong ka Ri India bad u la shim ïa ka Rashtriya salute jong ki 12 tylli ki parade contingent, kaba kynthup ïa ki pulit bad ki khynnah skul ha madan ïalehkai jong ka skul Christ King, Higher Secondary School.
Nalor ki prokram Sorkar, ka la don ruh ka Cultural prokram bad ka jingsam ïa ki khusnam sha ki nongjop.