Jowai, Jylliew 28 : Ka ophis jong ka District Social Welfare Officer ryngkat ka jingïatreilang ka District Hub for Empowerment of Women (DHEW), Jowai bad ki bor pynïaid District kila rakhe ïaka ‘International Day Against Drug Abuse and Illicit trafficking’ ha Ladthadlaboh Indoor Sport Hall, Jowai.
La rakhe ïa kane ka sngi shi bynta naka prokram Nasha Mukt Bharat Abhiyan Campaign halor ka phang, “A national Movement towards a Drug free India” and “Breaking the Chain, Prevention, Treatment and Recovery for All”. Ïa kane ka prokram la pynlong ha baroh shibnai lynter da kaba pynlong ïa ki prokram pyrshah drug kynthup ïa ki rally, ki marathon, ki jingïakop dro dur, ki jingïalehkai surok bad kiwei de ba la shim bynta da ki skul, ki kolej bad ki nongïalam shnong.
La donlang ha kane ka sngi da ka kong D.V Lyngdoh kaba dei ka Additional Deputy Commissioner, u Additional Superintendent of Police u Ishan Gupta, IPS, ka District Social Welfare Ophisar ka kong Y. Najiar nalor kiwei kiwei.
Ka kong D.V Lyngdoh haba ai jingkren kala pynsngew halor ka jingdonkam ban don ka jingïa sngewthuh jingmut bad ka jingïatylli kawei ban ïaleh pyrshah ïa une u jait jingdih ba sniew. Shuh shuh kala pynkynmaw la rakhe ïa kane ka sngi ha manla u snem haka 26 tarik u Jylliew ha kylleng ka pyrthei.
Ka la ong hapoh ka District la rakhe shibnai lynter ha ryngkat ki prokram bapher bapher, ha kaba la sam ruh ïa ki khusnam sha ki nongjop. Ka la ai mynsiem ïa ki samla pule ban kin long ki lawei jong ka shnong ka thaw bad kiba ïaleh pyrshah ban lait na u Drug.
U Additional Superintendent of Police u Ishan Gupta, ula kyntu ïa ki khun samla ba kin long kiba nang ban jied ïa kaba bha, da kaba kiar ïa kaba sniew khamtam ïa u drok, ula ong ruh kiba ngop ha u drug kala long ka jingmlien kaba sniew bad ka buh jingma ha ki kam runar ba bun jait. U kyntu ïa ki samla ban kin pynleit jingmut ha ka pule puthi, ki kam ïalehkai sports bad kiwei de ban ïoh ka jingkoit jingkhiah.
Ka kong Y. Najiar, DSWO kala kren shaphang ka National Nasha Mukt Abhiyan kaba la sdang haka 15 tarik August, 2020 daka tnad Social Justice and Empowerment. Da ka jingthmu ban raddiengkhong ïa u Drug ha ka Ri hi baroh kawei.
La pynlong ruh ïa ka jingsoi kyrteng bala shim bynta da ki samla pule bad baroh kiba wan sha katei ka prokram. Ïa kane ka prokram la pynïaid da ka kong S M Lamare, Gender Specialist ka DHEW, katba ïa ki kyntien ai khublei la ïoh na u H. Dkhar, uba dei u Member and Rted. Assistant Commandant of 3rd Battalion.
