Nongpoh, Lber 05: Ka University of Science and Technology Meghalaya (USTM) ha ka sngi nyngkong jong ka taiew ka la pynlong da ka prokram ba kyrpang ban rakhe don burom ïa ka lyngkhuh sngi ïap ba 8 snem jong u myntri rangbah barim ka jylla bad u Speaker barim ka Lok Sabha, u (L) P.A Sangma kum ka jingburom halor u synñiang u bynhei ba u la shakri na ka bynta ban kyntiew ïa ka jylla Meghalaya.
U Lat barim ka jylla, u R.S. Mooshahary u la wan ban shim bynta kum u kongsan ban rakhe ïa kane ka lyngkhun sngi ïap jong u (L) P.A Sangma bad la sakhi lang ruh da ka jingdon lang u Chancellor ka USTM u M. Hoque, u Vice chancellor ka USTM u Prof. G.D Sharma, ki samla pule bad ki nonghikai katei ka skulbah.
Haba kren ha kane ka sngi kum u kongsan, u Lat barim ka jylla u R.S Mooshahary, u la ong ba u P.A Sangma u dei uwei na u riew rangbah uba la phong ïa ka dur khmat jong ki jylla shatei lam mihngi ka ri India, lyngba ki kam kiba u la shakri kum u nongmihkhmat paidbah bad u long ruh u rangbah uba don ka jingiohi jngai kumno ban saiñdur ïa ka jylla Meghalaya bad ki jylla shatei lam mihngi ka ri India.
U la pynpaw ruh da kaba ong ba kawei na ka kam kaba khraw ba u P.A Sangma u la leh, ka dei kaba u la pynmih ïa ki khun kiba la don lut ka jingnang jingstad bad kam don kano kano ka jingkynnoh bamsap ïa ka ïing ka sem jong u. Nalor kata u la pynmih ruh ïa u khun, u Conrad K. Sangma uwei na u Myntri rangbah uba la stad bad uba la biang pura ha ka jingnang jingstad.
Da kaba ïaroh ruh ïa u P.A Sangma kum u nongïalam ka jylla, u la duh noh ïa ar tylli ki kyrdan hadien ba u la u la khlad noh na kane ka pyrthei, kata ïa ka kyrdan President ka ri bad ruh u Myntri rangbah ka ri, kaba dei na ka daw ka jingdon ka jingïaleh politik hapoh ka party.
Shuh shuh, u la bynrap ruh da kaba ong ba ïa ka jylla Meghalaya la ithuh sha ki rithor ka ri India, ka dei namar ba don kum kine ki nongïalam kum u P.A Sangma bad u kyrmen skhem ruh ba ka jylla Meghalaya kan dang lah ban pynmih ïa shibun ki nongïalam kiba lah ban shakri na ka bynta ban kyntiew ïa la ka jong ka jylla, u la bynrap.
Haba kren ruh ha kane ka sngi na ka liang u chancellor ka USTM, u M. Hoque u la ong ba ka USTM ka sngewburom bha ïa u P.A Sangma, ka dei namar ba u P.A Sangma u don ka bynta kaba khraw bha ban saiñdur ha kaba sdang ban seng ïa ka USTM bad u dei ruh u rangbah uba don ka jingiohi jngai kumno ban saiñdur ïa ka lawei ba phyrnai ki khun samla ha ka jylla.
U la pynpaw ruh da kaba ong, ba ka USTM ka shim ïa u P.A Sangma kum u nonghikai (Mentor) ïa ka USTM bad dei lyngba ka jingïasnoh kti lang jong u, ba ka USTM kat dang mih ki sngi ka la dang kiew ha baroh ki liang ban ai ka jingshakri na ka bynta ban kyntiew ïa ka pule ka puthi bad kiwei kiwei ki kam ban shakri sha ki paidbah ka jylla, u la bynrap.
