Shillong, Lber 08: Ka University of Science and Technology Meghalaya (USTM) ha ka sngi Saitjaiñ, kala pynlong ïa ka jingrakhe ïa ka International Women’s Day da kaba pynlong ïa ki prokram bapher ban ai burom bad ban pynkup bor ïa ki kynthei.
Ka Centre for Gender Studies bad ka Department of Economics ki la rakhe ïa ka Women’s Day da kaba pynlong ïa ka jingïalang halor ka phang “Self-care Matters: Prioritizing Women’s Health & Financial Literacy,” da kaba phaikhmat ha ka ban kyntiew ïa ka jinglong jingman bad ïa ka ïoh ka kot jong ki kynthei.
Katba ka Department of Social Work ka la pynlong ïa ka jingïalang halor ka phang “Celebrating Her Rights: Empowerment of Women in India” bad ïa kane la pynïaid da ka Kong Felicita Majaw, ka dkhot barim jong ka Meghalaya State Women Commission bad ka nonghikai barim jong ka Nongstoiñ College, kaba la sam ïa ki jingtip kiba kongsan ha kaba ïadei bad ka hok jong ki kynthei bad ka jingpynkup bor ïa ki hapoh ka ri India.
Na ka liang ka Department of Computer Science ka la pynlong ïa ka prokram halor ka mat “Celebrating the Strength and Stories of Women: Honoring a Lifetime of Wisdom and Experience” bad ïa kane la pynlong ha Sampriti Hewa Foundation, Bhetapara, Guwahati.
Katba ka Department of Physiotherapy ka la pynlong ïa ka Free Physiotherapy Camp kaba dei thik tang na ka bynta ki kynthei bad ka Department of Commerce pat kala pynlong ïa ka prokram halor ka phang “Women’s Health and Hygiene” ha Assisi School, Noksikgittim, Ri Bhoi, ha kaba ki khynnah kynthei kila ïoh ïa ka jingbatai bad la sam ruh ïa ki sanitary pad.
Ki dkhot jong ka USTM ki la pynkup burom ruh ïa ka Sister Alphonsa, Head Teacher jong ka Assisi School bad la pynlong ïa ka jingïalang ha kaba ka Dr. Trishna Sharma ka Assistant Professor jong ka Department of Prasuti Tantra bad Stree Roga, Ia Ayurvedic Medical College kila ai jingbatai kyrpang ha kaba ïadei bad ka koit ka khiah jong ki kynthei.
Ki dkhot ka USTM ryngkat bad ka University School of Law and Research (USLR) kila pynlong ïa ka prokram ha Tamulikuchi, 13 Mile, ban pynsngewthuh ïa ki nongshong shnong ïa ka hok ka jong ki khamtam ha kaban ujor ïa ki ejahar, katba ka Department of Earth Science bad ka Department of Sociology ruh ki la pynlong ïa ka jingrakhe ïa ka Women’s Day.
