Shillong, Jylliew: Ka Uplifter Club of Shillong ha ka 4 tarik mynta u bnai ka la rakhe ïa ka sngi pynneh pynsah mei mariang (World Environment Day) ha Umphyrnai-Jowai Road, National Highway Divider, NH-6 ha ryngkat ka jingsnohkti lang ka skul Sunrays Lower Primary bad Upper Primary School, ka Village Organization na Umphyrnai bad ki Volunteer jong ka NYK, Mawryngkneng Block.
Ha kane ka sngi hashwa ban sdang ïa ka prokram la pynlong ïa ka jingïalang ka ba lyngkot ha ka ba la ïoh ka jingkren pdiang sngewbha bad ka jingpynshai halor ka jingdonkam ban pynneh pynsah ïa ka mariang na u Vice Chief Associate ka club, Bah J.C Cajee, nangta bud sa ka jingkren na u Bah Synsharlang Lyngdoh, Accounts-In-Charge ka club uba la batai halor ka jingthmu jong kane ka prokram.
Shuh shuh la ïoh ruh ka jingkren lyngkot na i Principal ka Skul Sunrays LP bad UP, Kong Mebarika Kharkongor kumjuh na I Kong Airibell Kharkongor, nongïalam ka Village Organization bad khatduh eh na I Bakmenshisha Kharkongor, Volunteer jong ka NYK, Mawryngkneng Block.
Hadien ka jingïalang la ïashim bynta ha ka jingpynkhuid ïa ka shi lynter jong ka surok National Highway na Lad Smit haduh ba kut u Divider. Baroh ki nong ïashim bynta ki la ïatrei shithrem ban tam ïa ki plastic, bitor ki ba la pynjaboh bad pynisih ïa ka mei mariang bad hadien ka jingpynkhuid la bteng da ka jingthung ïa ki tynrai dieng ha ki Divider jong ka surok.
Ha kane ka sngi la thung ïa saw jait ki tynrai dieng kita ki long u Kashmir pine tree, cherry blossom, poma bad local pine tree ki ba la ïoh pdiang sngewbha na ka tnat Social Forestry bad la thung kumba 40 tylli ki tynrai.
