Mawkyrwat, ‘Nailur, 21: Ka Umsaitshriew Sports & Cultural Club (US&CC) ryngkat ka jingïatreilang bad ka ophis jong ka Nehru Yuva Kendra Sangathan (NYKS), Nongstoiñ ka la ïoh ban rakhe ïa ka ‘Vikas Diwas Day 2022’ ha ka 17 tarik u ‘Nailur, 2022 jong ka taïew ba la dep ha kaba ïa ka jingïalang la pynlong ha Community Hall jong ka shnong Umsaitshriew, South West Khasi Hills District bad kane ka jingrakhe ka la long kaba shongkun bad shongshit bha.
Ha katei ka prokram la ïoh ban pynlong da kaba ai jinghikai halor ka phangpdeng, “Together Development Lecture” ha kaba la wan ban ïashimbynta da ki shibun ki longkime bad ki rangbah jong ka shnong Umsaitshriew bad kumjuh ruh ka jingïadonlang jong ki nongtrei napoh ka Nehru Yuva Kendra (NYK) bad ha kajuh ka sngi la ïoh ruh ban pynlong ïa ka jingpynkhuid ïa ki rud ki kiar jong ka shnong da kaba tam ruh ïa ki plastik.
Ha kane ka prokram la pynïaid ïa ka jingïalang da u bah T. Sangriang uba dei uwei na ki ‘riew rangbah jong ka shnong Umsaitshriew ha kaba u la pdiang sngewbha ruh ïa baroh kiba la wan ha kane ka jingïalang. Nangta la ïoh ruh ka jingkren na u NYV, Mawkyrwat ha kaba ula pynshai halor ka jingthmu jong katei ka prokram bad ruh ula kyntu bad pynshlur ïa ki samla ba ka donkam ka jingïatreilang ban wanrah ïa ka roi ka par ha ka shnong ka thaw bad ha ka imlang ka sahlang. U la kyntu ruh ïa ki samla ba ki dei ban mih ban trei ki kam ba bha ha ka imlang ka sahlang bad ban long kiba shlur ban ban leh ïa kiei kiei kiba myntoi.
La ïoh ruh ka jingpynshai shuh shuh na i Resource Person, bah P. Thongni ha kaba u la pynshai halor ka jingdonkam ban wanrah ïa ka roi ka par ha ki bynta bapher bapher. U la kyntu namarkata, ïa ki samla jong ka shnong ba kumno ban long kiba shlur da kaba bud bad peit ïa ka nuksa jong ki ‘riew shlur kum u Mahatma Gandhi, u Tirot Sing kiba la long ki ‘riew shlur bad ki ‘riew shemphang kiba wanrah ïa ka jinglaitluid bad ka suk ka saiñ ha ka ri bad a jaidbynriew.
U la pynshai shuh shuh ba kum ki samla ki donkam ruh ka jingtrei shitom bad donkam ka jingïatreilang ban wanrah ka jingskhem bad ka suk ka saiñ, ka roi ka par ha ka imlang ka sahlang.
Ha kane ka prokram la ïoh rih ban ïashimbynta ha ka jingpynkhuid ïa ki rud ki kiar da kiba bun ki samla, ki kynthei bad ki rangbah ha kaba kane ka la ïarap shibun ban wanrah ïa ka khuid ka suba bad ka la ai mynsiem, kumno ban don ka jingkitkhlieh ïa ka mei mariang bad ban sumar khuid ruh ïa ka sawdong sawkun.
Lyngba kane ka prokram ka la long ka jingkyrkhu bad ai mynsiem ïa ki paidbah khamtam kumno ban long ki nongïalam bad kumno ban pynkhlaiñ ban wanrah ïa ka roi ka par da kaba ïatreilang lang ki paidbah nongshong shnong.
Ha kaba kut jong ka jingïalang, la ïoh ka jingkren ai khublei na u bah D. Khardewsaw.
