Rakhe ka tnad pulit ïaka “International Day against Drug Abuse and illicit trafficking” ha Jowai

Jowai, Jylliew 25: Ka tnad pulit jong ka West Jaiñtia Hills District Police ha ryngkat ka jingïatreilang bad ka Seiñ Kynjai mynta ka sngi 24 tarik kila rakhe ïa ka sngi pyrshah ïa u Drug uwei na ki jingdih ba sniew tam ïa kaba la tip kum ka “International Day against Drug Abuse and illicit trafficking” ba la pynlong mynta ka sngi ha Panaliar Community Hall.
Ha kane ka sngi u Dr. L.R Bishnoi, IPS Director General of Police, jong ka jylla Meghalaya ula long kum u kongsan ha ryngkat ka jingdonlang u Bikram D. Marak MPS Superintend of Police ka WJHD, ka Dr. A. Pasweth, Psychiatrist ka Jowai Civil Hospital Ialong ki ohisar na ka tnad pulit lem bad ki khynnah skul kiba la wan ban ïoh jinghikai na kane ka prokram.
U Dr. L.R Bishnoi, IPS haba ai jingkren kum u kongsan ula ong ka jingpyndonkam ïa u drok kala ktah ïa ka ri hi baroh kawei namar don bun ki mynsiem breiw kiba la khlad noh na ka daw ka jingkyrni ka jingdih ïa u drok.
Wat na ka liang ka tnad pulit ruh kala pyrshang ban thaw ki lad ki lynti ba pynsngewthuh ïa ki paidbah naduh ki khynnah skul, ki samla pule bad ki nongshnong shnong kumjuh da kaba pynlong ïa ki prokram ai jinghikai halor ki jingeh kiba lah ban mih na u drug, la ong u Bishnoi.
“Ha kine ki shibnai ba la dep ula pyntip ba ka tnad pulit kala dep ban pynlong 250 tylli ki prokram hapoh ki 12 tylli ki District jong ka jylla, ka tnad pulit ruh kala pyrshang ban khanglad bad tehlakam ïaka rukom pynpoi ïa une u mar nabar ka jylla hapoh kine ki 3 snem. Shuh shuh ula ong ba tnad pulit kala donkam ban thaw sa kawei Building la jong na ka bynta ban treikam ki ophisar pulit katkum ki kyndon jong ka ïing bishar ba don burom.
Sa kawei ka long ban ai jingsumar na ka bynta kito kiba la ngop ha ka jingkyni u drug da kaba kin wan shakhmat ha ryngkat ka jingïatreilang bad ki jaka Rehabilitation, ki nongtrei ka tnad ka koit ka khiah bad ka tnad Social Welfare.
Ula ong lyngba ki khynnah skul kiba la ïoh jinghikai halor ka jingsniew u drug ka don ka thong ba yn lah ban pynduh pyndap noh ïa une ujait jingdih ba sniew. Kumta u kyntu ba dei ban kiar na une u jait jingdih uba lah ban ktang ïa ka koit ka khiah, ïa ka ïing ka sem, ka shnong ka thaw bad ka ri hi baroh kawei.
Ïa ka jingïalang ha kane ka sngi la pynïaid da ka Deputy Superintendent of Police kong C W Lyngdoh, MPS la ïoh ruh ka jingrwai na ki kynhun pulit hapoh ka jingïalam u bah W. Khonglam.
Ha kane ka juh ka sngi ka District Social Welfare Officer, Jowai ryngkat ka Breakthrough Rehabilitation Centre, Khliehtyrshi kila pynlong ïa kane ka juh ka prokram ai jinghikai ha Ladthadlaboh Community Hall halor ka phang “Addressing drugs challenges in health and humanitarian care & crisis”.
La ïathuh ba kane ka prokram ka long shi bynta ban rakhe ïa ka jingdap 75 snem ka ri ne ka Azadi ka Amrit Mahotsav, ïa ka jingïalang la pynïaid da u Rev. L. Garod ha ka jingdonlang ka kong J. Synnah, District Social Welfare Officer. Ki nongai jingbatai ba bniah na ka kong D Bareh, field Co- ordinator SURE, Jowai, Dr. A. Paswet, Phyciatrist, Mental Health Civil Hospital, Ialong, u bah J. J. Wahlang, SI Police bad u ma R.Q Laloo, Secretary Synjuk Waheh Shnong, Jowai.
Ha kane ka prokram la ïashim bynta lang ha ka jingpule ïaka pledge kynthup lang ïa ki khynnah skul, na ka liang ka District Social Welfare office kala pynlong ruh ïa ka jingïakop dro dur bad ka jingsam ïa ka khusnam sha ki nongjop.