Rakhe ka St. John Bosco Higher Secondary School, Mawpat ïa ka ‘Parents Day 2025’

Mawkyrwat, Risaw 29: Ka St. John Bosco Higher Secondary School, Mawpat ka la pynlong da ka jing-i-phuh i-phieng ïa ka jingïalang ba kyrpang na ka bynta ki Kmie ki Kpa jong ki khynnah skul, kaba la tip kum ka ‘Parents Day Celebration 2025’ kaba ha ka phang pdeng, “Parents’ Love, The Greatest Blessings” – “kaba pynpaw ba ka jingieid jong ki Kmie ki Kpa ka dei ka jingkyrkhu bakhraw tam ïa ki khynnah”.
Ha kane ka jingïalang, u Bah Renikton Lyngdoh Tongkhar uba long u MLA ka Mawkyrwat Constituency u la long kum u kongsan, katba u Bah Commander Shangpliang, nongïalam ka Hill Farmers Union (HFU) kum u symbud kongsan ha ryngkat ka jingïadonlang ruh u Fr. Friny Peter u Principal jong ka St. John Bosco Higher Secondary School, Mawpat, u Fr. Valerian Sereao, ki Sister, ki Nonghikai, ki riewrangbah, bad ki kmie ki kpa jong ki khynnah skul.
Ha ka jingkren jong u Renikton Lyngdoh Tongkhar uba long u MLA ka Mawkyrwat Constituency ha ka jingïalang, u la pynpaw ka jingsngewkmen ba ki skul ha ki nongkyndong ki la nang kiew ha ka jingpule puthi lyngba ka jingtrei shitom jong ki Nonghikai, ki khynnah bad ki kmie ki kpa. Namarkata, u la kyntu ïa ki khynnah skul ba kin long kiba don ka thong ha ka jingim ryngkat ka jingtrei shitom bad ïai minot ban long ki nongjop, khnang ba kin nym pep skul noh shiteng por. Ym tangkata, ula kitbok kitrwiang ruh ïa ki Nonghikai bad ki khynnah baroh ba kin nang kyntiew shuh shuh ïa ka pule puthi ha ka shnong ka thaw.
Kaba pynkmen ïa ki khynnah skul bad ïa ki nonghikai bad kumjuh ruh ïa ki kmie ki kpa ka long ba ha kane ka sngi, u Renikton Lyngdoh Tongkhar uba long u MLA ka Mawkyrwat Constituency ula pynbna ban ai jingïarap pisa T. 2.50 lak tyngka lyngba ka skhim SRWP na ka bynta ki jingdonkam jong ka St. John Bosco Higher Secondary School, Mawpat.
Kiwei de ki program ha kane ka sngi ki long ba la ïoh ruh ban pynkup burom ïa ki ar ngut ki Nonghikai kiba la kynjoh 25 snem ha ka jingtrei jong ki kum ki Nonghikai ha kane ka St. John Bosco Higher Secondary School, Mawpat, kata u Babu Cornelius Marshra bad ka Kong Elnestina Marweiñ.
Ki khynnah skul ruh ki la pyni ïa ki drama lyngkot, ki jingrwai bad jingshad kiba don jingmut bad pynshohbiej ïa ki Kmie ki Kpa bad ïa ki paidbah baroh kiba la ïa donlang ha kane ka sngi kyrpang jong ka St. John Bosco Higher Secondary School, Mawpat.