Shillong, Nailur, 25: Ka Department of Sociology & IQAC, St. Edmund’s College, Shillong ryngkat ka jingïatreilang bad ka ophis State Commissioner for Persons with Disabilities, Sorkar Meghalaya ki la rakhe ïa ka International Day of Sign Languages, halor ka phang, “No Human Rights without Sign Language Rights.”
Ha kane ka sngi la ïashim bynta da ki khynnah pule jong ka St. Edmund’s Higher Secondary School, ki dkhot ka Meghalaya Deaf Association (MDA), ka Deputy Commissioner for Persons with Disabilities ka Kong Bridget Warshong kaba la long kum ka kongsan, Dr N. P. Laloo, Additional CEO ka SRCDA kum symbud Kongsan.
La plie ïa ka jingrakhe da ki jingshad kolshor kiba pynkynmaw ïa ki nongsngap ba ka jingïakren ka shong ym tang ha ki kyntien hynrei ha ka jingpynpaw, ka jingsngewrit bad ka jingdon ryngkat.
Ïa kane ka jingïalang la pynïaid da ka Kong Nafisabeth Syeimlieh ka nonghikai jong ka Department of Sociology bad pynbud pat da ka jingpdiang sngewbha da ka Kong Finley E. J. Syngai kaba dei ka Head jong ka Department of Sociology. U Principal i/c, u Brother Sunil Britto ha ka jingkren jong u u la pynkynmaw kumno ka Doordarshan ka la sdang da ka Sign Language ka pynkylla ktien ïa ka jingpule khubor bad ïa ki jaka ai jinghikai ban long kiba kynthup lang ïa ki briew baroh.
La pynlong ruh ïa ka jingïathir nia ba la pynïaid da u Shubhankar Sarma, u nonghikai jong ka Department of Sociology ba la ïashim bynta da ka Kong Bridget Warshong, Dr N. P. Laloo, u Dr Ram Sha kal Sahani, u Bah Dylan Robby Jones Syiem uba dei u Planning Officer ka SRCDA bad ka Kong Ripaia Passah, Assistant Commissioner for Persons with Disabilities.
Ha ki jingïatai, ki nongkren ki la pynpaw shaphang ka jingdonkam jong ki ktien ba shu pyni dak ha kaba kyntiew ïa ka jingïaryngkat bad ka burom bad ïakren ruh shaphang ki polisi treikam, ki jingthmu jong ka jylla bad ka jingdonkam kaba jur ban pynïasoh pdeng ïa ki sur jong ki briew kiba don jingduna ha ki dkhotmet.
La pynkut ïa ka prokram da ka jinghikai ïa ka ktien pyni dak ba la ïalam da ka Miss Rida na ka Meghalaya Deaf Association, kaba la pyni sha ki nongïashim bynta da kaba pyntbit ïa ki jingsdang jong ki ktien pynidak na ka bynta ka jingïakren kaba kynthup lang; ka jingdon jong ki ka la pynjylliew ïa ka jingïakren, namar ki jingshem shimet ki pynkylla ïa ki mat kiba rit sha ki jingshisha kiba ïasam lang.
Ka khubor ka la long kaba shai: ka jingithuh ïa ka ktien dak ka dei shaphang kaba kham palat ban ïa kaba shu ïakynduh; ka dei shaphang ka jingïada ïa ka hok longbriew manbriew, ka imlang sahlang, bad ka jinglong trai.
