Mawkyrwat, Nohprah, 08: Ka Sohkhyllam Sports Club ha ryngkat ka jingïatreilang bad Ka Nehru Yuva Kendra Sangathan (NYKS), Nongstoiñ ka la ïoh ban rakhe ïa ka sngi ba kyrpang ka International Volunteers Day 2022, ha ka sngi nyngkong jong ka taïew ka 05 tarik u Nohprah, 2022 ha Sohkyllam Resource Centre, South West Khasi Hills District.
U Resource Person ha kane ka program u dei u bah Josterland Jyrwa uba dei u nonghikai jong ka Sohkhyllam Presbyterian L.P. School ha kajuh ka por u dei ruh u General Secretary jong ka Seng Samla Shnong Sohkhyllam.
U Resource Person ha ka jingkren jong u ula pynshai halor ka phangpdeng jong kane ka program kaba ong, “Solidarity Through Volunteering” da kaba ula kyntu ïa ki samla ba ki dei ban don ka jingkitkhlieh na ka bynta ka ri bad ka jaidbynriew baroh kawei ban wanrah ka jingkylla na ka bynta ka bha ka miat ka shongsuk shongsaiñ bad ban ïaleh ban rad dyngkhong ïa ki jingsniew kum u drugs, ka kyiad bad kiwei kiwei bad u la ong ba ki dei ban sdang nyngkong na ki shnong ki thaw.
Kawei pat, u la khot bad wer bad ïa ki para samla ba ki dei ban long kum kita ki shipai da kaba kin dei ban don ka mynsiem trei mon sngewbha khlem da khmih lynti ban ïoh-nong lane ïoh pisa. U la ong ba ki dei ban trei hok, trei smat bad trei da ka mynsiem.
Ha kane ka programme la ïoh jingkren na u Biangbor Pyrkhat Nongsiang u la ong ba ki samla ki dei ka lawei na ka bynta ka ri bad ka jaidbynriew u ong ba ki samla kiba khlaiñ bad kiba stad ki dei ki samla kiba wanrah ïa ka jingkylla ha baroh ki liang. Ula ong ruh ba kum ki samla haba don kino kino ki program ngi dei ban ïa shimkhia bad ka donkam ka jingïalong kawei bad ka jingïañiewkor bad burom mar kylliang.
La ïoh ruh ka jingkren na u General Secretary jong ka Sports Club ha kaba ula ai khublei ïa ka ophis jong ka Nehru Yuva Kendra Sangathan kaba dei ka Ministry of Youths Affairs & Sports Govt of India kaba la ju ai jingïarap ïa ka Sports Club na ka por sha ka por la ka long ha ka liang ki sports material bad ka fund lyngba ka jingpynlong ïa ki program bapher bapher naduh ki snem ba lah dep haduh mynta.
Ha ka jingkren jong u, ula ong ka kane ka dei ka sngi kyrpang kaba dei ka International Volunteer Day ka dei ïa ki samla ban kynmaw burom ïa kum kane ka sngi khamtam ïa kito ki samla kiba long ki nongïalam kiba stad bad bashlur kiba treimon sngewbha kiba la noh synñiang ha ki kam jong ki la ka long ha ka shnong ka thaw, ha ka Seng Samla Shnong bad ha ka Sports Club ruh kumjuh kiba la wanrah ka roi ka par ha baroh ki liang.
Shuh shuh u la ong ba kum ki samla ki dei ban don ka jingïalong kawei bad ki dei ban mih shakhmat ban ïalam ïa kiwei khnang ba ki longdien mandien kin pyrto bad kin kynmaw ïa ki kam ba ki leh ha ka pateng ban wan.
Ha kane ka sngi la ïadonlang ryngkat naduh u General Secretary jong ka Sohkyllam Sport Club, ki rangbah jong ka Shnong, ki nongkitkam jong ka Seng Samla Shnong bad ki National Youth Volunteers jong ka Nehru Yuva Kendra Sangathan, Nongstoiñ.
Ha kane ka program la ïoh ruh ban pynlong ïa ka Cleaning Drive ha kaba la ïashimbynta da baroh kiba wan attend da kaba la ïoh ban pynkhuid ïa ki ñiut bad tam ïa ki plastik naduh ïa ka phyllaw jong ka Resource Center haduh ka surok PWD naduh ka surok Nongtepdieng haduh ka surok Phot Japung.
