Nongpoh, Nailar 23: Ka skulbah University of Science and Technology Meghalaya kala rakhe ïaka World Photography Day da ka jingïakop shondur bad ka shna ïaki reel haka ïasnohkti lang bad ka Nikkon India bad kane ka jingrakhe kala pynpaw pyrthei ruh ïaki nongshondur kiba donsap kiba dang kiew shaphrang haka kam shondur.
Kane ka jingrakhe ka la sdang naduh mynstep, ha kaba ki samla pule kila shim bynta ban ïaid kai ki sawdong jong ka USTM ban shim ïa ka jingitynnad jong ka mariang lyngba ki lens jong ki.
Hadien ka jingïakop shondur la pynlong ruh ïaka jingïalang ha NKC Auditorium ha kaba la wan ban shim bynta da ki nongshondur, ki nongthoh khubor ba paw ba kynthup ïa u Pankaj Saikia, Tarun Siwach, Senior Manager Technical, Nikon India nalor kiwei kiwei.
Haba kren ha kane ka sngi naka liang u Pankaj Saikia ba dei u nongthoh khubor ba paw u la kren halor ka bor jong kam shondur ba ka jingshondur kam dei tang ban ioh ïaka dur kaba ngi la dep ban shon, hynrei ka don ruh ka khana, ka pynmih ïa ki jingsngew, bad pynneh pynsah ïa ki jingkynmaw.
Kawei ka dur ka lah ban pynpaw ïa ka jingjylliew jong ka jingshem jong u briew, ban pynmih ïa ka jingsngew bad ki jingkylla.
Ha katei ka sngi la ioh ruh ban sam ïaki khusnam sha ki nongjop haki jingïakop shondur ban pynpaw pyrthei ïaka sap kaba ki don kum ka jingai mynsiem ïaki ba kin dang kiew shaprang ban ïathuh khana sha ka pyrthei lyngba ki dur bad ki durkhih.
