Nongpoh, Nailur 26: Ka skulbah Mahatma Gandhi University, mynta ka sngi ka la rakhe ïa ka Pharmacist Day, kum ka jing ai burom ïa ki nongai dawai kiba don ka bynta ba khraw ban kyntiew ïa ka koit ka khiah jong ki nongpang bad ka imlang ka sahlang.
Ïa kane ka prokram la wan ban plie paidbah da u Mr. Zahidul Mozumder, Scientific officer & Drug Analyst, State Drug Testing Laboratory, Assam kum u kongsan ha Auditorium jong ka skulbah, ha ka jingdonlang u Dr. Krishna Reddy Dean cum Professor, ki samla pule bad kiwei kiwei.
Ha katei ka prokram na ka liang u kongsan u la ai ka jingïaroh ïa ki nongtrei pharmacy kiba long kum ki shipai ba hakhmat ha kaba ïadei bad ka koit ka khiah khamtam ban pynthikna ba ki paidbah ki pyndonkam ïa ki dawai ha ka rukom kaba dei.
Ha katei ka sngi la pynlong ruh ïa ka prokram ïathir bad ïatai sani halor ka rukom pyndonkam ïa ki dawai, bad kiwei kiwei ryngkat ka jingpynkup burom ïa ki nonghikai, ki nongtrei pharmacy, ki samla pule bad kiwei kiwei lem bad ki jingïakop bapher bapher.
Shuh shuh na ka liang ka skulbah ka la pynlong ruh ïa ki prokram sumar ei sha ki shnong ba Marjan, ha kaba ki nongtrei pharmacy lem bad ki samla pule ki la leit ban ai dawai bad ban batai sha ki paidbah nongshong shnong ha kaba palat 250 ngut ki paidbah ki la ioh jingmyntoi na kane ka prokram.
