Nongpoh, Lber 30: Ka skul Persara UP School kaba dei kawei naki shlem ai jinghikai haka thaiñ Umsning kala long kawei naki skul kaba la nang phyrnai katba nangmih ki sngi wat hapdeng ki rai eh rai dam bad ki jingeh kiba bun haka jingïaid lynti pynban katei ka skul kala long ka shlem ban lum ban lang ban phrang ïaka lawei ki heprit haka liang ka jingnang jingstad bad ka pule ka puthi.
Katei ka skul mynta kala kynjoh ruh ïa u mawmer ba 25 snem jong ka jingïaid lynti naduh ba la seng ïaka ha u snem 1977 kaba la sdang ruh ïaka jingrakhe hynnin ka sngi ïaka jubili rupa bala wan ban plie pyrda da u Bah Bipul Thangkhiew President ka RBYF sengkmie kum u kongsan haka jingdonlang u Bah Rocky Kylla Chairman ka Umsning Town Durbar kum u symbud kongsan, Bah George Dkhar Chairman jong ka skul, ki Rangbah Shnong ki riew rangbah naka thaiñ Umsning lem bad ki nonghikai, ki khynnah skul jong katei ka skul.
Haba kren maitphang ha katei ka sngi naka liang u Bah George Dkhar ba dei u Chairman katei ka skul u la ïathuh ba kumno la sdang ïa katei ka skul bad ki jingeh ba bun ki mad haka jingïaid lynti, la ka long haka liang ka pisa bad kiwei kiwei, da kaba kyrtiang dien ruh ïa shibun ki riew rangbah naduh ka seng RBYF kaba la noh synñiang ïa katei ka skul ban pyntyllun ïaka ban long ka shlem ai jinghikai kumba ka long bad ieng haduh mynta.
Naka liang u Bah Bipul Thangkhiew kum u kongsan haba kren ha katei ka sngi u la pynpaw ka jingsngewsarong ba katei ka skul hapdeng kiba bun ki jingeh, ka long pat ka sngi kaba phyrnai bad kaba sah jingkynmaw hadien ba kala ioh ban rakhe ïaka jingdap 25 snem jong ka jingïaid lynti ban dang pyntyllun ïaka jingshakri haka liang ka pule ka puthi bad ka jingnang jingstad.
U la pynkynmaw ruh ba ka RBYF kala don ka bynta ban kyrshan ïa katei ka skul watla ka long tang ka pisa kaba rit eh ban pyndap ïaka jingdonkam jong ki nonghikai bad ka jingïaid beit ïaid ryntih jong katei ka skul bad kalong ka khubor kaba bha ban tip pat ba katei ka skul naduh ba la seng ïaka kala kynjoh mynta 25 snem.
“Ka jingnang jignstad ka long kaba kongsan khamtam ha kane ka juk kaba mynta ba ka jingpang bym ioh kam iohjam ki khun samla ka saphriang ha kylleng ki jaka jong ka jylla bad wat ki ri ka pyrthei bad dei namarkata ka long kaba donkam ba ki khun samla kin minot thop haki jingpule khnang ba ki khlur bad ki khraw pyrkhat kin mih haka jylla ban synshar ïa u lakam haki liang baroh la ka long haki ophis sorkar, ki nongmihkhmat bad kiwei kiwei” u la bynrap.
Naka liang ki bor pynïaid skul kila kynmaw burom ruh ïaka kong Angela Lyngdoh bam kwai ha dwar u Blei kaba la ai jaka shipor ban shna ïaka iing skul, I Bah Phngaiñ Manik Lyngdoh Bam kwai ha dwar u Blei bad ki khun ki kti kiba la ai sngewbha ïaka jaka khlem da siew eiei ban tei ïa ka iing skul kaba la ieng mynta ha Umsning Lum Umpih.
