Shillong, Jylliew: Ka Dinet Manik Syiem Higher Secondary School ka la rakhe ïa ka sngi pynneh pynsah mei mariang (World Environment Day) ha ka 4 tarik mynta u bnai Laitkor ha ka ba la ïashim bynta shitrhem da ki khynnah skul bad ki nonghikai kumjuh.
Ka jingthmu ba kongsan ha ka ban pynlong ïa kane ka prokram ka long ban pynsngewthuh bad pynshai paidbah ha ka ba ïadei abd ka jingshah ktah jong ka mei mariang lyngba ka jingpynduh ïa ki khlaw ki btap bad halor kiei ki sienjam ki ba donkam ban shim khnang ban lah ban pyndep ïa kane ka jaka ba thylli.
Na ka liang ki nonghikai bad ki khynnah skul jong ka skul Eriben Presbyterian Secondary School bad ka St Ferrando Secondary School ruh ki la wan ïashim bynta lang ha ka ba thung ia kumba 200 tylli ki tynrai dieng ha ki bynta jong ka shnong Laitkor Nongdaneng.
Nalor kata la pynlong ruh ïa ka prokram ka ba lyngkot hapoh Hollywood hall ha ka ba la ïoh ïa ka jingkren na I principal jong ka Dinet Manik Syiem I Kong Drimsibon Kharkongor i ba la kren halor ka mat ‘Only One Earth’ lane tang kawei ka pyrthei ka phang ka ba khot na ka bynta ban wanrah ïa ka jingkylla na ka bynta ban pynjyrngam bad ban wanrah pat ïa ka jingkhuid jingsuba ha ka mei mariang.Nalor kata I la ban ruh halor ka jingdonkam ban shim ïa ki sienjam ki ban pynurlong ïa jingthmu bad ki jingangnud ha ka ba ïadei bad kane ka bynta.
Shuh shuh la pynshit pynshngaiñ ïa kane ka sngi lyngba ka jingïalehkai drama lyngkot halor ka phang ‘Save Trees’ da ki khynnah pule klas 12.Ha kane ka sngi la ïoh ruh ban sam ïa ki jingbuh sahkynmaw bad ki syrnot sha kito ki nong shah khot sngewbha.
