Rakhe ka Shillong Law College ïa ka jingdap 61 snem ka jingai jinghikai ïa ka subjek aiñ

Shillong, Nailur 26: Ka Shillong law college ka la pynlong bad rakhe ïa ka sngi seng kaba 61 snem ha ka sngi Thohdieng hapoh ka Shillong law college. Ha kine ki jingsdang ban rakhe ïa ka jingdap ba 61 snem jong kane ka College bad ki jingïaid lynti ha kine ki snem ka Law College, ka la pynmih ïa bun ngut ki nongbishar, ki nongsaid aiñ bad ki muktiar ha kane ka jylla bad ki jylla kane ka thaiñ shatei lamihngi.
Ïa kane ka prokram rakhe sngi kha la pynlong da ka IQAC committee jong ka college ha kaba u President jong ka Governing body u Bah W Khyllep retd IAS bad uba dei ruh u nongpule ba la rim ka college u la long u kongsan. Kiwei pat ki nongshah khot sngewbha ba kyrpang ki kynthup ïa u Senior Advocate u Subahshish Chakravorty uba la pule ruh kane ka college, nangta u Secretary D B Gurung, nangta Principal Dr Shariffuddin, ki dkhot ka Governing Body, ki nongtrei bad ki samla pule ki la donlang ha kane ka sngi rakhe ïa ka jingdap ba 61 snem jong ka College.
Haba kren kum u kongsan u Bah Khyllep u la pynpaw ïa ka jingkmen kaba khraw ban ïoh don bynta lang ha kane ka sngi bad ban ïakmen lang ha kane ka sngi.
Na ka liang jong u, u la kyntu ruh ïa ki samla pule ba kin trei shitom naba ka jingpule ïa ka subjek jong ka aiñ ka long kaba donkam bha ha kane ka juk kaba mynta bad khamtam haba ïatyngkhuh bad kino kino ki kam kiba ïadei bad ka aiñ.
U la ai khublei ïa principal, ki nonghikai, ki nongtrei, bad baroh kiba don bynta ban kyntiew ïa kane ka jaka pule ha kane ka jylla. Ha shwa ban sdang ka prokram na ka liang u kongsan u la kyntiew ïa ka lama ka college. La don ruh ki Cultural program bad kiwei kiwei ki prokram kiba la pynphuh phieng ïa kane ka sngi bakhraw jong ka college.