Nongpoh, Jylliew 04: Kum shi bynta ban ïa snoh kti lang ha shi tyllup ka pyrthei ïa kata ka sngi kyrpang ba la tip kum ka ‘World Environment Day’ lane kata ka sngi pynneh mariang, ka Seng Rangbah Katholik Byrnihat Parish mynta ka sngi ki la pynlong ïa ka jingrakhe ïa kane ka sngi pynneh mariang ha St. Savio Baridua ha Ri Bhoi District.
Haba rakhe ïa kane ka sngi pynneh mariang da ka Seng Rangbah Katholik Parish Byrnihat la wan ban shim bynta da u MLA ka Jirang, u Bah Sosthenes Sohtun kum u kongsan bad ryngkat ka jingdon lang u MDC ka Jirang, u Bah Victor Rani, u Parish Priest ka Byrnihat Parish, u Fr. Anil Joseph, ka Sister Mooli, Headmistress ka Savio secondary School bad ryngkat ki khynnah skul bad ki nongshong shong ka shnoing Baridua.
Ha kane ka sngi, ka Seng Rangbah Katholik Parish Byrnihat ym tang ba ka la rakhe kyrpang ïa kane ka sngi pynneh mariang ba la tip paidbah kum ka World Environment Day, hynrei ka la pynlong ruh ïa ka jinghikai sha ki paidbah ba kin sngewthuh halor ka jingkordor ban ïada ne pynneh pynsah ïa ka mei mariang bad ha kajuh ka por ha kane ka snngi la thung ïa ki tynrai dieng ba la kot 150 tynrai ha phylla ka jong ka skul bad ha ki bynta jong ka shnong Baridua.
Haba ai jingkren ruh ha kane ka sngi kum u kongsan, u MLA ka Jirang, u Bah Sosthenes Sohtun u la ai ka jingïaroh ïa ka Seng Rangbah Katholik ka Parish Byrnhat, namar kum ki rangbah ym tang ba ki don bynta ban ai ka jingshakri ha ka kam ka jong u Blei, hynrei ki don ruh ka mynsiem ban ieit kyrpang ïa ka mariang ban rakhe ïa kane ka sngi shi bynta ban hikai sha ki paidbah ba ki donkam ban pynneh pynsah ïa ka mariang.
Shuh shuh, u la bynrap ruh da kaba ong ba ha kine ki sngi la donkam ban don kata ka mynsiem jong ka jingïatrei lang na ka bynta ban khanglad ïa ki jingpynjot pathar ïa ka mariang, namar lada ngim kyndit bynriew ba ïada kyrpang ïa ka mariang ka long ka jingma ïa ka pateng ban sa wan jong ka jaid bynriew.
Namarkata, u la khot la wer ïa baroh ki paidbah ba kin don kata ka mynsiem ban ïada ïa ka mariang ha kaba ha kine ki sngi bun ki la shu pynjot pathar ïa ka mariang bad kum u nongmihkhmat paidbah u kwah ba kane ka jinghikai shapbang ka jingdonkam ban ïada ïa ka mariang kam dei ban kut noh tang ha kane ka sngi bad ngi dei ban bteng man la ka sngi khnang ban gin lah shisha ban pynneh pynsah ïa ka mei mariang, u la bynrap.
