Shillong, Naiwieng, 04: Ka Seng Kur Warjri ka la sdang ban rakhe ïa ka lyngkhuh snem Rupa naduh ka 1tarik mynta u bnai da ka pyninam syntiew bad kiwei kiwei ki mar rep ka ba la pynlong ha Forever Rosely Nursery, Pomlum ka ban kut ha ka sngi saitjaiñ mynta ka taiew.
Ka jingrakhe kaba bud kan long da ka Dorbar Bah jong ka Kur Warjri ha Sohryngkham ha ka 11tarik mynta u bnai, ïa kane la pyntip da u Bah Sunshine Warjri, Saiñpynïar ka Seng Kur Warjri ha ka lympung pathai ha kaba u la kyrpad ïa baroh ki parakur na kylleng ka Bri Hynñiewtrep ba kin ïa poi ryntih ha katei ka sngi.
La ïathuh lyngkot ruh ïa ka jingthmu jong ka seng Kur Warjri bad ki kam ba la leh ha kine ki 25 snem ba la leit kata naduh ba la seng ha u snem 1998. La pyntip ba naduh ba la seng ki don tang kumba lai tylli ki shnat bad mynta pat ki la roi haduh kumba laiphew tylli ki shnat jong ka Seng Kur Warjri. Ka jingrakhe ïa ka lyngkhuh arphewsan snem kan kut ha u snem 2023 da ka Dorbar Bah ka ban long ha Mawphlang.
Ha ka ba ïadei bad ki rong ki taw ban rakhe ïa ka Lyngkhuh Snem Rupa, u Bah Kester Warjri, Shongknor ka Lympung Rakhe u la ïathuh ba kin don ki lat kiba khia thew kum ka thoh ka tar ha ki ba bun ki rukom naduh ka thoh khana, thoh phawar, nangta ka thohdur bad kiwei kiwei ki kam pynproh jabieng bad pynphuh pynphieng artat ïa ka jingrakhe. Nalorkata, kin don ruh ki tamasa shad, rwai bad tem sur bad kiwei kiwei ki kam byrngia ki ba kynthup ruh kum ka jingthmu ban kyntiew ïa ki sap jong ki samloa ha ka Kur Warjri.
Ka Seng Kur Warjri ka la pyrto ruh ïa u synñiang jong u Khliehduh ba mynshwa u Bah D.L. Warjri, uba la khlad noh na ka pyrthei ha u snem baladep bad mynta la shimti ïa ka kam khliehduh da u Bah George Warjri ha ryngkat bad la ka kynhun treikam.
