Shillong, Nailur 04 : Ka Sankardev College Shillong, ha ka sngi Thohdieng ka la rakhe ha ka rukom kaba shongkun bha ïa ka jingdap 60 snem ka jingïaid lynti bad ka jingshakri jong ka College ha ka pule puthi ha kitei ki phew snem ba la leit.
La donlang ruh ha kane ka sngi naduh u Myntri ka tnad Pule Puthi ka jylla, Bah Lahkmen Rymbui kum u Kongsan nalor ki heh sorkar na ka tnad pule puthi bad ruh na ka RUSA Cell jong ka jylla kynthup ki nonghikai na ki college bapher bapher bad ruh ki samla pule.
Ha kane ka sngi khraw, u Kongsan u la plie ruh ïa ka PG Block (South Wing) kaba la donlang ka Lift bad ka Auditorium ba la bei tyngka da ka RUSA 2.0 bad da ka pisa jong ka College. U Myntri u la pynkup burom ruh ïa ki samla pule ka college kiba la leh bha bad wan sha khmat ha ki eksam ba la pynlong da ka NEHU, da kaba ai ïa ki ka Academic Award of Excellence. Nalor kine, u Myntri u la pyllait ruh ïa ka College Anthem bad ïa ka Diamond Jubilee Souvenir.
Na ka liang ki samla pule ki la pyni ruh ïa ka jingriewspah jong ka thaiñ shatei lam-mihngi jong ka Ri India da ka jingïashim bynta jong ki samla pule college kum ha ka shad Mastieh, ka shad Sukra, ka Wangkala na ka Jylla Meghalaya, kumjuh ruh ka jingshad Assemese, Arunachal bad Nepali.
Ïa ka jingïaid lynti ba 60 snem jong ka College la pynsahnam da kaba ring bad pyni paidbah lyngba ka jingpynidur (Video) kaba pyni shai ïa shibun ki mawjam sah kynmaw jong kane ka shlem jingnang jingstad naduh ba la seng ïa ka haduh kane ka khyllipmat kumba ka long mynta.
Ka long shuh shuh kaba i shongkun ban ïohi ba ki nonghikai ki la pynpaw ïa ka jingshit rhem jong ki lyngba ka sap rwai sap tem ba paka jong ki. Ka don ruh ka jingpyni ïa ka jingïalehkai drama lyngkot da ki samla pule ba ki ai kyrteng ‘Reflection’ kaba la ai ka jinghun ïa ki nongpeitkai baroh.
Na ka liang ka Principal ka College, Dr Eureka F. P. Lyngdoh, ha ka jingkren pdiang, ka la pynphalang ïa ki soh pyni ba ka College ka la ïohkheit ha ki snem jingïaid lynti jongka na i jingsdang ha ka 2tarik u Nailur, 1962. Ka la ong ruh ba kim lah ban mutdur kumno ki plung mynta kumne kumba ka long. Ha kaba kut, u Prof K. Chyne, Vice-Principal u la ai bad pynpaw ka jingkhublei ïa baroh kiba la ïa don bynta lang ha kane ka sngi rakhe Jubilee. Ïa kane ka jingïalang rakhe jubilee la pynïaid bad lamphang da u Prof M.S. Warjri bad ka Dr. R Nongrum ki IQAC co-ordinator jong ka College.
