Nongpoh, Jymmang 04: Ka Ryntihlang Village Organization ha ka Shnong Byrwa ba hap ha Umsning C&RD Block ka la rakheh ïa ka jingdap shi snem ka jingïaid lynti ka seng ban shakri ha ka imlang ka sahlang.
Kane ka jingrakhe kaba neh haduh 2 sngi lynter ka la sdang naduh ka 29 tarik u Ïaiong bad la pynkut noh ha ka 30 tarik u Ïaiong ha Shnong Byrwa, Ri Bhoi.
Ïa kane ka jingrakhe la plie da u MLA ka Umnsing, u Bah Jason Mawlong ha ka jingdon lang Bah Wallam Kharwanlang, BPM NRLM Umsning Block, u Rang bah Shnong Bah K. W Shylla bad kiwei kiwei.
Kane ka jingrakhe la pynlong da ka jingïatrei lang ki 11 tylli ki SHG ba hap ha kane ka Village Organization.
Ha kine ki ar sngi ka Ryntih lang Village Organization ki la pynlong ruh ïa ka Fete bad kum juh ruh ka tamasa bam tynrai shi bynta ban pynmih pisa iaka village organization ba kan dang lah shuh shuh ban ai ka jingshakri ha ka imlang ka sahlang.
Ha katei ka sngi, u MLA ka Umsning, u Bah Jason Mawlong u la ai khublei kyrpang ïa ka Ryntihlang Village Organization kaba la lah ban rakhe ïa kane ka jingdap shi snem bad khamtam ban ïa trei lang da ki SHG bapher bapher ban kyntiew ïa ki Long kmie bad ruh ban don lang ka jingkitkhlieh na ka bynta ban kyntiew ïa ka shnong ka thaw ha ki kam pynroi ne ki kam pynbha pynmiat jong ka shnong ka thaw.
U MLA u la kular ruh ban dang ai ka jingïatrei lang bad kine ki Longkmie ha ki snig bad ki por ban sa wan bad khamtam ban ïarap kyrpang ïa ki Longkmie na ka bynta ba kin dang lah ban ieng ha la ki jong ki kjat ban pyndap ïa ka ing ka sem bad ruh ban don lang ka jingïatrei lang na ka bynta ban kyntiew ïa ka bha ka miat bad ka roi ka par jong ka shnong ka thaw.
