Rakhe ka Ri-Bhoi College ïa ka jingïaid lynti 40 snem, kynmaw burom ïa u Principal ba nyngkong

Nongpoh, Nailur 10 : Ka Ri-Bhoi College kaba dei kawei naki shlem ai jinghikai bala kham rim bad ba paw ha Ri-Bhoi District, hynin ka sngi kala kynjoh ïa u mawmer ka jingïaid lynti ba 40 snem naduh bala seng ïaka ha u snem 1984 bad kynmaw burom ruh ïa u Principal ba nyngkong jong katei ka College u Bah (L) R.I Masharing.
Ha kane ka jingrakhe la wan ruh ban shim bynta da u MLA ka Nongpoh Constituency, u Bah Mayral Born Syiem kum u kongsan. Ha kane ka jingialang la iadon lang ruh u Principal u E.C. Benny, ki khun jong u (L) R.I. Masharing, u Bah R.R. Kynsai Makdoh uwei naki dkhot ba don bynta ban seng ïa katei ka College, ki nonghikai, ki samla pule bad ki dkhot ka Ri Bhoi College Students’ Union (RBCSU).
Naka liang u Principal katei ka College u E.C. Benny, u la ai ka jingiaroh ïa ka RBCSU halor ka jingpynlong ïa kane ka prokram bad u la ai ruh ka jingïaroh ïa ka jingthmu bad ka jingiohi jngai ki nongthaw ïa katei ka College bad ka jingtrei shitom jong u (L) R.I. Masharing, kum u nongïalam ba nyngkong jong katei ka College ba kan kiew shakhmat. U la ong ba, “Ka jingiatylli bad ka jinglen lade jong ki nongseng ïa katei ka College ka dei ka daw ba ngi ieng skhem haduh mynta ka sngi”.
Naka liang ka kong D Syiem kaba dei ka khun jong u Bah (L) R I Masharing kala pynpaw ka jingsngewkmen kaba khraw halor ka jingkynmaw burom ka Ri-Bhoi College ïa u synñiang u bynhei bala noh da u kpa jong ka ba katei ka College ka iengskhem bad nang kiew shaphrang katba nang mih ki sngi kumba ka long mynta.
U Kongsan, u Bah Mayral Born Syiem, ha ka jingkren jong u, u la pynpaw ïa ka jingdonkam ban kynmaw bad ai burom ïa kiba la noh synñiang ban thaw ïa ka College kum u (L) R.I. Masharing, uba la mad shibun ki jingeh bad ki jingïaleh, kum u nongïalam ba nyngkong jong katei ka shlem hikai ban prat lynti bad ban kyntiew ïa katei ka College na uwei u snem sha uwei pat tad haduh ba kan da ieng skhem kumba ka long mynta.
U Bah Mayral u la kyntu ïa ki samla pule ba kin shim bynta ha ki kam imlang sahlang nalor ban kiew shaphrang ha ka jingpule. U la kular ruh ba ha ka jinglong MLA jong u, un iai kyrshan ban kyntiew ïa ka Ri Bhoi College ha ka liang ka jingtei bad ka roi ka par. La pynphuh ha kane ka sngi da ki jingrwai bad jingshad na ki samla pule ka College.