Shillong, Jylliew 21: Ka Raj Bhavan ha ka sngi Thohdieng ka la pynlong ïa ka prokram kaba shongkun ban rakhe ïa ka Foundation Day jong ka jylla West Bengal. Ïa kane ka jingrakhe la pynlong ha Durbar Hall jong ka Raj Bhavan ha kaba la don ruh ka jingpyni nam ruh ïa ka kolshor bad ka jingnoh synniang jong ki Jaidbynriew Bengali kiba shong ba sah ha Meghalaya.
U Kongsan ba donlang ha kane ka sngi dei u Chief Secretary ka Jylla, Bah D P Wahlang nangta ki heh sorkar na ki tnad bapher bapher bad ruh na ki jaka pule ba bun.
Na ka liang u Dr. B.D.R. Tiwari, IAS, Commissioner & Secretary jong u Lat u la ai ka jingkren pdiang sngewbha da kaba pynkynmaw ïa ka jingïoh jylla jong ka West Bengal bad ruh ka jingïadei kaba jan hapdeng ki nongshong shnong jong ka West Bengal bad ka Meghalaya. Ka la don ruh ka jingpyni ïa ki video shaphang ka Foundation Day jong ka West Bengal da kaba pyni ïa ka jingïaid lynti bad ka jingnang kiew jong kane ka jylla.
La pynshong kun shuh shuh ïa ka prokram da ka jingpyni ïa ka kolshor bad ki prokram ba ha rukom da ka tnad Arts and Culture bad Indian Council for Cultural Relations (ICCR). Soulful bhajans da ka Paromita Paul na Shillong Music College, ka jingrwai kynhun na ka Rilbong Sports and Cultural Club and Shillong Tagore Choir, bad ka jingshad ba itynnad na ka Gitanjali Dance Academy.
Haba kren ha kane ka jingïalang u Chief Secretary u la ai burom ai ka jingnoh synniang jong ki Bengali ha ka jingkyntiew lang ïa ka kolshor bad ka imlang sahlang ha Meghalaya. U ong ruh ba ka long kaba sngewtynnad ban rakhe lang ïa kane ka sngi kum kata ka “Ek Bharat, Shreshtha Bharat”.
Ka jingrakhe ka long ruh kum shi bynta ban pynkynmaw ïa ka jingdon bynta jong ka West Bengal ha ka ri khamtam haba ïadei ha kiba bun ki liang la ka long ha ka thoh ka tar, ka jingïakhun laitluid bad kiwei kiwei. Kane ka long katkum ka kyrwoh ba la phah ophis treikam jong u Lat.
