Rakhe ka ophis u EE, PHE ïa ka ‘Jal Arpan Diwas’ ha South West Khasi Hills District

Mawkyrwat, Rymphang 04 : Kum shibynta jong ka jingrakhe ïa ka ‘Jal Arpan Diwas’, kaba dei ka sngi ka sngi lehkmen ïa ka jinglongtrai ïa ka umbam umdih lyngba ka Jal Jeevan Mission bad namar ba baroh ki longïing ki la ïoh paka ïa ka umbam umdih kaba long 100% ha manla ki thliew ïing, ha ki jaka hikai bad ki Aganwadi Centre.
Ym tangkata, kum ka dak jong ka jingithuh ba ki shnong kin ïoh ban longtrai, ka ophis jong u Executive Engineer ka PHE Mawkyrwat Division ka la aiti noh ha ki 5 tylli ki shnong ïa ki syrnod na ka bynta kane ka skhim kaba la biang pura ka umbam umdih bad khnang ba kin pynïaid bad peit hi noh ïa ki jingdonkam baroh.
Ki San tylli ki shnong kiba ka ophis ka la jied kyrpang ban ai ki syrnod ha kane ka sngi ki kynthup ïa ka shnong Sasniang, ka shnong Pyndendiwah, ka shnong Mawtngam, ka shnong Jashiar bad ka shnong Nongdewsaw ha kaba kine ki shnong kiba la ïoh ïa ka jingithuh kum ki ‘Har Ghar Jal Village’.
Ym tangkata, ka ophis ha kane ka sngi la ïoh ruh ban sam ïa ki syrnod ba la tip kum ka ‘Har Ghar Jal’ sha ki 5 tylli ki shnong bad kumjuh ruh ïa ka ‘As Built Drawing’ ne ka map kaba pyni ïa ka jaka kaba don ki tyllong um, ki jaka filter, treatment plant, ki pipe um bad ïa ka jingdon jong ki longïing kiba la ïoh um lyngba ka skhim Jal Jeevan Mission.
U Bah Renikton Lyngdoh Tongkhar, MLA ka Mawkyrwat Constituency kum u kongsan haba kren ha ka jingïalang ula ai ka jingïaroh na ka bynta ka jinglah jong ka ophis u PHE, Mawkyrwat Division ban bud-dien bad pyntyllun stet ïa ka kam kat haduh ba ki longïing hapoh ka South West Khasi Hills District ki la jan kot haduh 100% ka jingpoi ka umbam umdih ha ki longïing, watla ki dang don ki shnong ki bym pat lah ban pyndep ruh.