Nongpoh, Jylliew 29: Kum ka jingkynmaw burom halor shibun ki kam bala noh synñiang da u Late Professor Prasanta Chandra Mahalanobis, ka ophis u District Statistics Officer, Ri-Bhoi District mynta ka sngi kala rakhe ïaka National Statistics Day kaba la ju rakhe haka 29 tarik Jylliew ha baroh kawei ka ri India halor ka phang “Data for Sustainability Development” haka District Library Auditorium Hall ha Nongpoh.
Ha katei ka sngi ka kong VA Hynniewta, Additional Deputy Commissioner ka Ri-Bhoi District kala wan ban shim bynta kum ka kongsan, haka jingdon lang u Bah HB Lyngdoh District Statistics Officer, CN Arengh Inspector, bad u Bah B Pyngrope Sub Inspector bad kiwei kiwei ki ophisar na kiwei ki tnad sorkar, ki nonghikai lem bad ki samla pule naki skul bad college.
Haba kren ha katei ka sngi, naka liang ka kong VA Hynñiewta kala pynpaw ba kum katei ka prokram ka long kaba kongsan ha kaba ïadei bad ka statistics ne ban lum thup ïaki jingtip (data) haka imlang ka sahlang, da kaba ai mynsiem ruh ïaki samla pule ha katei ka sngi ba kin pyniar ïaka jingmut jingpyrkhat jong ki, ban pyndonkam ïaka statistics haka jingim jong ki ba man ka sngi.
U Bah HB Lyngdoh kum u DSO u la pynpaw ba katei ka sngi ka dei ka jingrakhe ïakas ngi kha jong u PC Mahalanobis uwei naki riewstad bad riew shemphang u la noh synñiang shibun sha ka imlang ka sahlang lyngba ka Statistics bad kumno ban nang pyniar ïaka rukom pyrkhat ban kyntiew ïaka ioh ka kot bad ban shna ïaki rukom treikam bapher bapher.
La pynlong ruh ki jingïakop bapher bapher ha katei ka sngi bala wan ban shim bynta da ki skul bad ki college ha kaba la sam ruh ïaki khusnam sha ki nongjop.
