Nongstoiñ, K’ Lyngkot 23: Kum ka jingïasnoh ktilang ha ka jingrakhe ïa ka sngi ba kyrpang kaba khat hynriew jong ki paidbah nong thep vote ha ka ri baroh kawei kaba la pynbeit da ka Election Commission jong ka ri India ka ophis jong u Deputy Commissioner ka West Khasi Hills ha kane ka sngi Thohdieng ka 23 tarik Kyllalyngkot ka la pynlong ïa ka prokram ba kyrpang ha TRYSEM Hall ha ophis jong u Deputy Commssioner ha Nongstoiñ. Ha katei ka sngi la pynïaid ïa ka jingïalang da u Bah V. Swer Additional Deputy Commssioner uba dei ruh u ERO jong ka Rambrai Jyrngam.
Ha katei ka jingrakhe ïa katei ka sngi la ïadonlang da ka Hema Nayak IAS Deputy Commissioner ka West Khasi Hills, u Bah R. Kharkongor Superintendent of Police West Khasi hills, ki BDO jong ki Block hapoh ka district, ki ophisar na ki tnad treikam bapher bapher ki nongtrei sorkar bad ki rangbah shnong.
Ha kaba sdang eh u Bah Swer u la pynshai halor ki kyndon ba ka Election Commission jong ka ri India ka la buh beit buh ryntih na ka bynta ki paidbah nongshong shnong kiba la biang ka kyrta ban ïoh thep vote na ka bynta ban jied ïa ki nongmihkhmat sha ki dorbar Thaw Aiñ kiba leit ban mihkhmat na ka bynta ki paidbah ha ka Ïngdorbar jong ka ri ka Parliament kiba la tip kum ki Members of Parliament bad ruh ïa ki nongmihkhmat sha ki Ïngdorbar Thaw Aiñ jong ki jylla kiba la tip kum ki Members of Legislative Assemblies.
U Bah Swer u la pynshai ruh ba ka ri India kum ka wei na ki ri synshar paidbah ba heh tam ha ka pyrthei ka don ïa ka Riti Synshar kaba khlaiñ kaba kynthup ruh ïa ki kyndon bad ki aiñ kiba paka kumno ban jied ïa ki nongmihkhmat paidbah khlem da don kano kano ka jingnoh shilliang hynrei baroh ki paidbah nongshong shnong hapoh ka ri ki don kajuh ka hok ban jied ïa ki nongmihkhmat.
U la ong ruh ba kum ki paidbah nongshong shnong donkam ban shim khia bad ban nym pynsep ei ïa ka vote bad ym dei ban kheiñ sting bad pynsep ei ïa ka vote ba kordor da kaba ai daw ba kim treh ban leit thep vote namar kim lait por.
Hadien ka jingpynshai jong u Bah Swer la ïoh ruh ïa ka jingkren na u Isack Momin MCS. U Bah Momin haba ai jingkren ha katei ka sngi u la ong ba na ka bynta ban pynïaid beit ïaid ryntih ïa ka jingthep vote ha ki por Election ka jingïatreilang jong ki ophisar bad ki paidbah nongshong shnong ka long kaba donkam haduh katta katta.
U la ong ruh ba ka sorkar lyngba ki District Election Officers ka la ïaleh katba lah ban pynshai sha ki paidbah ha kaba ïadei bad ka jingpynrung kyrteng ha ki Electoral roll da kaba thung ïa ki BLO ha man la ki Block na ka bynta ba kin ïarap ban leit pynshai sha ki paidbah ha man la ki polling station halor ka hok ban thep vote ban pynrung kyrteng ruh ïa ki nongshong shnong kiba la biang ka kyrta ha ka thup jong ki nongthep vote. Khatduh eh la ïoh ïa ka jingkren na ka Hema Nayak IAS Deputy Commissioner ka West Khasi Hills.
Ka Deputy Commissioner haba ai jingkren ha katei ka sngi ka la ong ba katkum ka jingtip jong ka ka jylla Meghalaya ka dei ka jylla kaba lah ban pynïaid beit ïaid ryntih bha ïa ki Election baroh bad man la ki por Election kam ju don kano kano ka kynrum kynram. Ha kajuh ka por ka la kyntu ïa ki paidbah nongshong shnong ba kin ïatreilang bad ki ophisar sorkar ha kaban wan rah ïa ka Election kaba khuid bad kaba ïaid beit.
Ha katei ka sngi la sam ruh ïa ki khusnam sha ki lai ngut ki BLO kiba la trei shitom bad pyndep hok ïa la ka kam ram kaba la bynshet ha ki.
