Nongpoh, Nohprah 03: Kum ka jingaiburom ïa kito kiba don ka jingduna haka dkhot met halor ka sngi kyrpang jong ki ba la ju rakhe man la u snem, ka ophis ka District Social Welfare Officer ka Ri Bhoi ryngkat ka jingïatrei lang bad ka Nongpoh Area Women Welfare Association mynta ka sngi ki la rakhe ïa kane ka sngi kyrpang ba la tip kum ka International Day of Person With Disabilities ha ka jingïalang kaba la pynlong ha Dorbar Hall, Sajer ha Nongpoh.
U MLA ka Nongpoh Constituency u Bah Mayral Born Syiem u la wan ban shim bynta kum u kongsan bad la sakhi lang ruh da ka jingdon lang u Deputy Commissioner ka Ri Bhoi u Abhilash Baranwal, ka District Social Welfare Officer ka Kong N.F Sun, u Bah S. Pyrbot Manager ka District Resource Centre on Disability Affairs Ri Bhoi bad ha ryngkat ka jingdon lang ki kmie ki kpa, ki nongïalam bad kynthup kitei ki ba don ka jingduna ha ki dkhot met.
Ha kane ka sngi la pynlong ruh ïa ki jingïakop bapher bapher ba la shim bynta da kitei ki ba don ka jingduna ha ki dkhot met bad la don ruh ka jingsumar ei ïa ki, ba la shim bynta lang da kitei kiba do ka jingduna ha ka dkhot met ha kane ka sngi kyrpang jongki.
Haba kren kum u kongsan ha kane ka sngi, U Bah Mayral Born Syiem u la ai ka jingïaroh ïaka opis ka DSWO Ri Bhoi bad ïa ka Nongpoh Area Women Welfare Association kiba la shim khia ban pynlong ïa kane ka jingrakhe ïa kane ka sngi kyrpang kiba duna ka dkhot met bad kane ka jingrakhe ka long kum ka jingai mynsiem ba wat la ki don ka jingduna ha ka dkhot met, hyrnei kin ioh mynsiem ba ki long lang kumjuh ha ka imlang ka sahlang khlem da don kano kano ka jingleh shiliang.
U la pynpaw ruh ïa ka mynsiem jong ka jingsngewkmen ban iohi ba bun kito kiba don ka jingduna ka dkhot met ha ka jingim, hynrei ki don pat ka sap kyrpang bapher bapher ha ka jingim, ha kaba kim duna satia kumba long lem kito kiba biang ha ka dkhot met.
Namarkata, kum u nongmihkhmat paidbah u la buh ruh ka jingkyntu ïa baroh ba kim dei ban don ka jingpeit khmat ïa kito kiba don ka jingduna ha ka dkhot met bad ki dei ruh ban sngewthuh ba wat la ki don ka jingduna ha ka dkhot met bad ki don pat ïa kajuh ka hok ha ka longbriew man briew ha kano kano ka imlang ka sahlang kaba ngim dei satia ban pynïapher ne khein bein ïa ki, u la bynrap.
