Nongstoiñ, Risaw 11: Kum ka jingïadon bynta lang bad ka pyrthei shi tyllup, ka ophis jong ka District Social Welfare Officer West Khasi Hills, ha ka sngi palei jong kane ka taïew ka la pynlong ïa ka jingrakhe ïa ka sngi ba kyrpang ki khynnah kynthei kaba la tip kum ka Inter National Day for Girl Right.
Ha katei ka sngi la pynlong ïa ka jingrakhe ha Leonel Futsal Arena Pyndengrei, ha kaba ki ophisar na ki tnad treikam bapher bapher jong ka sorkar ki la wan ban ïa don ryngkat.
Ka jingrakhe ïa katei ka sngi la pynlong ruh ïa ka jingïalang ha kaba la ïoh ïa ka jingpynshai na ka kong D.Pakynteiñ District Social Welfare Officer halor ka phang “Girls Vission for the future”. Ka kong Pakynteiñ ka la pynshai ruh ba katei ka sngi ba kyrpang na ka bynta ki khynnah kynthei, ka dei kawei na ki bynta ba ka pyrthei shityllup ka ju rakhe kyrpang na ka bynta ki longkmie kaba la tip kum ka Inter National Women Day.
Ha kajuh ka por la ïoh ruh ïa ka jingkren na ka kong E.Tariang District Medical & Health Officer West Khasi Hill, kaba la pynshai kumno ban long ki ba koit ba khiah ha ka met ka phad bad ki jingmut jingpyrkhat, khamtam ïa ki khynnah kynthei kiba dang sdang ban khie ban san bad na ka bynta ki khynnah shynrang. Ka la kyntu ba ki dei ban kiar na ki jingdih pynbuaid bad ki jingmlien ba sniew.
Ha katei ka sngi la ïoh ruh ïa ka jingkren na ka kong N.Wanñiang Assistant Commissioner kaba la shah khot kum ka kongsan, ha kaba ka la pynshai halor kiba bun ki hok ba ki khynnah kynthei ki dei ban ïoh. Ka la ong ruh ba ha ki por ba la dep ki kynthei ki ju shah ban beiñ ha kiba bun ki bynta hynrei katba ka por ka nang ïaid ki kynthei ka la nang kiew ha ki liang baroh.
Ka la kyntu ruh ïa ki khynnah kynthei ba lada don kino kino ki jingshah lehbeiñ, kim dei ban sngewrit mynsiem tang namar ba kidei ki kynthei. Hynrei ki dei ban mih shakhmat ban leit pyntip sha ki bor ka aiñ.
Ka la pynshlur ruh ïa ki khynnah kynthei ba ki dei ban smat bad pynmlien ha ki jingïalehkai ba bun jait. Kumjuh ruh ban pynleit jingmut ha ki jingpule jong ki khnang ba kin ym shah ibeiñ ne shah kheiñ poh ha kiwei pat.
