Jowai, Jylliew 29: Ka District Statistical Officer (DSO), West Jaiñtia District mynta ka sngi kala rakhe ïa ka sngi kyrpang ka ‘National Statistics Day 2022’ ïa kaba la pynlong ha Mynthong Community Hall, Jowai halor ka phang kaba ong “Data for sustainable Development”. Ha kaba u bah R. Sumer uba long u Deputy Director of Economic & Statistics Meghalaya Shillong ula long kum u kongsan.
Ïa kane ka sngi la rakhe ha baroh kawei ka ri kum ka dak ban kynmaw burom ïa u Prasanta Chandra Mahalanobis, uba long ruh u nongseng ïa kane ka kam ban buhbeit buh ryntih ïa ki jingkheiñ jingdiah hapoh ka ri, ïa kaba la tip ruh ïa u kum u kpa ka Indian Statistics. La ïathuh ba la kha ïa u Prasanta Chandra Mahalanobis haka 29 tarik mynta u bnai, ha u snem 1893, ha nongbah Calcutta.
Katba na ka liang u kongsan haba ai jingkren ha kane ka sngi ula ong ba ka jingdon ka Statistic kan ïarap shibuh eh ban pynïaid ïa ki kam ki jam hapoh ka Ri kaba kynthup naduh ki ophis treikam sorkar bad ki shnong ki thaw, shuh shuh kane kan ïarap kumjuh ïa ka rukom pynpoi ïa ki marbam mardih, ka jingïoh jingkot jong ki nongtrei sorkar bad kiwei de.
Kiwei de kiba ai jingkren ha kane ka sngi ki kynthup ïa u bah T.K Sawian Distrcit Statictical Officer WHJD, bah P. Syiemlieh Inspector of Statistic nalor kiwei de ha ryngkat ka jingdon lang ki khynnah skul bad ki nonghikai skul.
