Rakhe ka ophis DM&HP, DLSA bad Ranikor CHC ïa ka “World Suicide Prevention Day”

Ranikor, ‘Nailur 12: Ka ophis jong ka District Mental & Health Programme (DM&HP), South West Khasi Hills District kaba hap hapoh ka jingpynïaid jong u District Medical & Health Officer (DM&HO), South West Khasi Hills District ryngkat ka jingïatreilang jong ka ophis jong ka District Legal Services Authority (DLSA) bad ka Ranikor CHC ka la rakhe ïa ka “World Suicide Prevention Day” ne ‘ka sngi ban ïada na ka jingïap da kaba dkhat jubor ïa la ka jingim’ halor ka phang, “Changing the narratives on suicide” ha Ïew Ranikor, Ranikor Civil Sub Division, South West Khasi Hills District.
Ha ka jingïalang, u Dr. F.R. Lartang, District Medical & Health Officer (DM&HO), South West Khasi Hills District ha ka jingkren halor ka phang pdeng jong mynta u snem kaba dei, “Changing the narratives on suicide” kaba mut ban pynkylla noh ïa ka jingbatai, jingsngewthuh ne jingkren halor ka jingshim noh ïa ka jingim lade, u la ong ba ka la dei ka por ban pynduh noh ïa ka jingkren beiñ bad i-beiñ hynrei dei ban ïarap ïa kito kiba shem jynjar ne jingkhia jingmut bad shah ktah ha ka jingmut jingpyrkhat khnang ba kan pyllait ïa kiba kum kita na ka jingshim ïa ka jingim lade.
Ka Dr. L. Dhar, Psychiatrist Civil Hospital, Mawkyrwat ka la ong ba ha kane ka sngi ha kaba baroh shityllup ka pyrthei ki rakhe ïa kane ka World Suicide Prevention Day kaba dei ka program ha ka ban kyntiew jingtip lyngba kine ki mat kiba ktah ïa ka jingim u briew bad wanrah jingdum ha ka jingim jong u. Ka la ong ruh ba long kaba donkam eh ban kin long kiba kloi ban kyrshan ne ban ai mynsiem iwei ïa iwei ban pynlong ruh ka imlang sahlang kaba bha, lada ki ïohi ki dak ki shin ba u ne ka briew ki don ïa ka jingthmu ban bthat ïa ka jingim lade, ha kaba kum ka imlang sahlang ka dei ban wad jingïarap na ka bynta jong ki.
Ka jingduh jingkyrmen, bad ka jingbym kheiñ kor ïa lade, ki long ki dak ki shin ba bunsien ki briew tang bakla tiak ki shim noh ïa ka jingim la jong namar kum kine ki briew ki kheiñ bym kordor ïa lade ki sngewbeit ba ki long ka jingwit ïa ka ïing ka sem, ki bun ki jingmut jingpyrkhat, bym ïoh thiah, ki don ïa ka jingpyrkhat sniew, jingduh mynsiem, bad ki pyrkhat beit ba kim donkam ban im ha ka pyrthei, ka bam ka dih ruh ki duna, ki duh noh ïa ka jingsngewtynnad ban leh ïa kiba ki mlien ban leh. Namarkata, lada ki shem ïa kino kino briew kiba don ïa kine ki dak ki shin ki dei ban ïarap ban pynsngewthuh ïa ki bad ruh ban phah ïa ki ban leit wad jingïarap na ki Hospital ne jaka sumar.
Ka la ong ruh ba ha ka South India State jong ngi kum ka Chennai, Kerela, Bangalore ki shait bun bha kiba thmu ban shim noh ïa ka jingim lade bad ki don ar jait kiba ïa dei ba ka jingshim noh ïa ka jingim lade kawei ka dei ka jingpyrshang ban shim noh ïa ka jingim lade ha ka rukom ba kin nym ïap kawei pat ka jait ban shim noh ïa ka jingim lade ka long da kaba don ïa ka ta ka jingthmu bad pynkhreh da ki sngi ki bnai ïa ka jaka bad ka por ba kin leh ïa kata ka kam.
Namarkata, ka la kyntu ruh ïa ki paidbah ba lada ki ïohi ïa kine ki briew kiba don kine ki dak ki shin ba ki dei ban ai mynsiem ïa ki, kren bha ïa ki bad ïarap ia ki ban lait na kine ki jingsngew. Ka la ong ruh ba skul ruh ki dei ban sdang ban hikai ïa ki khynnah kumno ban leh bha bad ai mynsiem iwei ïa iwei khnang ba kan wanrah jingkylla kaba khraw ha ka jingim jong ki briew.
Kiwei de ki nongkren ki long ka kong D. Sohtun, Chief Judicial Magistrate cum Secretary District Legal Service Authority, South West Khasi Hills District kaba la kren ïa ki katto katne ki aiñ, u Myntri Shnong ka Ranikor, u Dr. A. Kharnaior u Medical & Health Officer jong ka Ranikor CHC, bad u Dr. W.L. Narry, Nodal Officer jong ka District Mental & Health Programme, South West Khasi Hills District u la pynïaid ïa ka jingïalang katba ka kong A. Lyngkhei, Clinical Psychologist, District Mental & Health Programme ka ai ki kyntien khublei.
Kham hashwa, ka la don ruh ka jingïakop dro jingdro ba la shim bynta da ki skul ba hap ha Ranikor C&RC Block ba kynthup ïa ka St. Thomas U.P School bad United Khasi Garo L.P & U.P School, Ranikor ha kaba jop da ka Santa Mery T. Sangma na ka skul St. Thomas U.P School, ba ar da u Jost Nonglang na ka skul United Khasi Garo L.P & U.P School bad ba lai da ka Strem R. Marak na ka St. Thomas U.P School, nangta ka la don ruh ka skit ba lyngkot na ka PHL Group napoh Mawkyrwat.