Mawkyrwat, Nohprah, 09: Ka ophis jong ka District Legal Services Authority (DLSA), South West Khasi Hills District ha ryngkat ka jingïatreilang ka Meghalaya State Legal Services Authority, Shillong, ka ophis jong u Superintendent jong ki Pulit, South West Khasi Hills District & ka ophis One Stop Centre, Mawkyrwat bad ka Dorbar Shnong Nongkulang, South West Khasi Hills District mynta ka sngi ka la pynlong ïa ka program jong ka jingrakhe ïa ka “World Human Rights Day” ha kaba ïa ka jingïalang la pynlong hapoh ka Yeiñ Dorbar Nongkulang.
U bah S.J. Kharbhih, Officer In-charge jong ka Nonghyllam Police Station haba kren ha ka jingïalang u la kren bad batai ïa ki katto katne ki mat ba kongsan kiba ïa dei bad ka hok longbriew manbriew jong ki paidbah nongshong jong ka ri India kata ïa ki 6 tylli ki hok kawei ka dei ka hok ban ïalong kajuh, ka hok jong ka jinglaitluid, ka hok ban ïeng pyrshah ïa ka jingshah leh beiñ, ka hok ban mane Blei laitluid, ka hok ban pynïeng ïa la ka jong ka riti ka dustur, ka hok ban pule, bad kiwei de ki hok. Nalor ki hok, ha kajuh ka por u la batai ruh khyndiat shaphang ki kamram ba ki nongshong ki dei ban leh.
Ka kong Memory Marweiñ na ka One Stop Centre office, South West Khasi Hills District, pat ka la kren halor ka jingtreikam jong ka ophis bad ka ïarap ruh ha kiba bun ki bynta lada ki paidbah ki donkam.
Kiwei pat ki nongkren ki long u bah B. Syiemlieh, Co-ordinator jong ka Meghalaya State Legal Services Authority, ka kong Nosmi Hahshah, Panel Lawyer jong ka DLSA, bad u Assistant Secretary Shnong jong ka Shnong Nongkulang.
Ha kane ka sngi la ïoh ruh ban pynlong ïa ka jingïakop dro jingdro ha kaba u Dametipbha A. Sangma ba nyngkong, ka Ridaplin Hahshah ka wan ba ar bad ka Clearinsis Nongbri kaba wan ba lai kiba dei ha ka karta ba 4 haduh 14 snem. Nangta, sha u Wallambok Nongbri ha ka kyrdan ba nyngkong, u Desmond Nongtnger ha ka kyrdan ba ar, bad u Saiñborlang Nongbri ha ka kyrdan ba lai kiba dei ki khynnah ba 13 haduh 18 snem.
Ban pynsngewthuh shuh halor kane ka jingrakhe ïa kane ka sngi kyrpang la ïoh ruh ban pyn i ïa ka phlim ba lyngkot kaba kyrteng ka “Nangno ka jingïarap kan wan”.
