Rakhe ka NSSO, Shillong ïa ka “Swachhata Pakhwada 2024”, ryngkat bad ka jingpynkhuid, jingthung dieng

Shillong, Naitung 01: Ka NSSO, Shillong ka la pynlong ïa ki prokram bapher bapher kum shibynta ka “Swachhata Pakhwada 2024”. Ka Swachh Bharat Mission kadei ka prokram ba kyrpang jong ka Sorkar India, ba la sdang da u Myntri Rangbah duh ban pynurlong ïa ka jingangnud jong u Mahatma Gandhi ban pynlong ïa ka India kaba khuid ba suba. Kadei ka campaign ha kylleng ka ri ba la plie paidbah da u Myntri Rangbah duh ka ri ha u 2004 ban pynduh ïa ka jingleit bar pathar bad ban kyntiew ïa ka rukom lum ïa ki ñiut ki ñier.
Ka Tnat Statistics bad Programme Implementation ka la pynlong man ka por ïa ka Swachhata Pakhwada. Ki bynta ba kongsan ba ka Campaign ka phaikhmat ka kynthup ka jingsdang ïa ki jingpynkhuid ban pynthikna ba ki sawdong sawkun baroh kawei ki long kiba khuid. Kum shibynta ka Swachhata Bharat Mission, ka Tnat Statistics bad Programme Implementation ka la rakhe ïa ka Swachhata Pakhwada 2024 naduh ka 16 haduh 30 tarik Jylliew, 2024. Ha ki ar taïew, ka NSSO (FOD) Regional Office Shillong ka la phaikhmat kyrpang ban kot sha ka jingkhuid jingsuba da kaba kyntiew ïa ka jinglong jingman ha ka ophis. La pynlong ïa ki prokram bapher bapher kum ka jingthung dieng ha ka jaka ïalehkai Golf ryngkat bad ka jingpynkhuid ïa ki sawdong sawkun jong ka, ka jingnohsynniang sha ka Rajasthan Vishram Bhawan, Garikhana da ki jaka bret ïa ki ñiut ba pyut bad bym pyut bad ka jingpynkhuid ha ki bynta jong ka Police Bazar, Shillong bad ki jaka ba marjan. Kane ka campaign kaba 14 sngi ka la long kaba jop bad ka la don ka jingiashim bynta shitrhem da baroh ki ophisar bad ki nongtrei jong ka ophis NSSO (FOD) RO Shillong da ka thong ban pynlong ïa ki sawdong sawkun jong ka ophis bad ka Nongbah Shillong kaba khuid bad kaba lait na ki ñiut plastic.