Rakhe ka NPWF ïa ka sngi kyrpang ki longkmie,da ki spah ngut shah pynkup burom halor u synniang ba kila noh

SHILLONG, Jymmang 12: Ka National People Women Front (NPWF) jong ka Meghalaya State Unit, kum shi bynta ban kynmaw burom ïa la ki jong ki Kmie kiba la pun la kha bad pynheh pynsan, ha ka 10 tarik mynta u bnai Jymmang kala pynlong ïa ka jingrakhe ïa ka sngi ba kyrpang jong ki longkmie ne ka Mother’s Day.
ïa kane ka jingrakhe ka NPWF, kala pynlong ha ki lai tylli ki block jong ka ri lum Khasi Jaintia.
Ha ka jingshisha ïa ka sngi ban kynmaw burom kyrpang ïa ki longkmie ne ka Mother Day ka dei ha ka 11 tarik u Jymmang bad namar ba ka ïa tyngkhuh noh bad ka sngi u Blei, kumta ka NPWF kila rakhe noh ha ka sngi Saitjain.
Ki Block kiba la rakhe ïa ka sngi kyrpang ki kmie ki kynthup ha Nongpoh kaba don ïa ka kong Rona Khymdeit kum ka MDC jong ka party NPP, ha Pynursla Block ba don ka Kong Grace Mary Kharpuri ka MDC jong ka Nongshken Constituency bad ha Jowai Block ba don ïa ka Kong Violet Lyngdoh kaba dei ka MDC shimet hynrei kaba la rung bad pynïasoh noh ïa lade sha ka party NPP.
Haba phai sha ka jingrakhe ïa ka sngi ba kyrpang ki kmie ha Nongpoh, kaba la pynlong ha Parish Hall Nongpoh, u MLA ka Mawhati u Bah Charles Pyngrope u la shim ïa ka bynta kum u kongsan ha ka jingdon lang ryngkat ka kong Jasmine Lyngdoh kaba dei ka President jong ka NPWF State Meghalaya Unit, ka MDC ka thaiñ ka Kong Rona Khymdeit bad kiwei de ki nongkit kam ka party.
Ha kane ka sngi kum shi bynta ban ai burom ïa ki longkmie kiba trei ha ki bynta bapher bapher kiba kyntiew ïa ka imlang ka sahlang kila shah pynkup burom ha ka NPWF kila don ym duna \ïa ka shi spah ngut.
Ha ka jingrakhe ha Jowai Block la pynlong ha Shnong Dorbar, Lion Mission Compound, ha kaba u MLA ka Jowai u Bah Wailad Miki Shylla u la shim ïa ka bynta kum u kongsan haka jingdon lang bad kiwei de ki nongkit kam ka party nalor kiwei pat ki longkmie kiba la shah pynkup burom ha ka NPWF.
Haba phai sha ka jingrakhe ha Pynursla kaba la pynlong ha Dorbar Hall jong ka shnong Pynurlsa, ka MDC jong ka Nongshken ka Kong Grace Mary Kharpuri kala long ka kongsan ha ka jingdon lang ryngkat u Bah Rahbok Tynsong bad kiwei de ki nongkitkam jong ka party bad ha kane kajuh ka sngi la pynkup burom ruh ïa palat spah ngut ki longkmie.
Na ka liang jong ka National People Women Front, Meghalaya State Unit ha shwa ban pynkup burom ïa kine ki longkmie kida jied ban peit bniah bha ïa ki longkmie kiba trei ha ki bynta bapher bapher kiba long shisha ki jingnoh synniang sha ka imlang ka sahlang bad khamtam eh iba ïarap ruh ïa ki paralongkmie bad kumjuh ruh ïa kito ki longkmie kiba ïeng ha la ki jong ki kjat.