Nongpoh, Lber 31: Ban kyntiang dien sha ki 25 tylli ki snem ba ka skul Nongmawlong Presbyterian L.P School ka la shakri ban pynphraing ïa ka jingnang jingstad bad ban kyntiew ka pule ka puthi ha katei ka thaiñ, ki bor pynïaid ka Nongmawlong Presbyterian L.P School, kaba dei kawei na ki skul Nongkyndong kaba don hapoh katei ka shnong Nongmawlong mynta ka sngi ki la pynlong ïa ka jingrakhe ïa ka Jubili Rupa kaba dei ka jingïaid lynti ba 25 snem naduh ba la seng ïa katei ka skul ha u snem 1997 ha ka Shnong Nongmawlong ha Ri Bhoi.
Nalor ki nonghikai, ki khynnah skkul bad ki nonghsong shnong ka Nongmawlong, ha kane ka sngi ba la rakhe ïa kane ka Jubili Rupa katei ka skul la wan ban shim bynta da u MLA ka Umsning, u Bah Jason Sawkmie Mawlong kum u kongsan bad la sakhi lang ruh da ka jingdon lang u Rev. L.S Nongphlang, Pastor Rangbah ka Ri Bhoi Presbyterian Synod kum u symbut kongsan bad ha ryngkat ka jingïadon lang ki pastor, ki tymmen basan bad kiwei kwiei ki riew rangbah.
Haba phai sha kane ka skul, kumba ka la kynjoh sha ka jingïaid lynti kaba 25 snem naduh ba la seng ïa kane ka skul bad la sakhi kumba la pynpaw da ki bor pynïaid skul ba kane ka skul ka dang don hapdeng shibun ki jingduna ban kyntiew ïa ka pule ka puthi bad kum ka skul ka dang donkam ruh shibun ki lad jingïarap ban pynbit pynbiang na ka bynta ban dang lah ban kyntiew ïa ka pule ka puthi ha katei ka thaiñ.
Na ka liang u MLA ka Umsning, u Bah Jason Sawkmie Mawlong, haba kren ha kane ka sngi u la pynpaw ka jingkmen ban ïa don bynta lang ha kaba rakhe ïa kane ka jingdap 25 snem kane ka skul bad u ai ruh ka jingïaroh ba ba kane ka skul wat lada ka dang don shibun ki jingduna, hynrei kane ka skul ka la shakri bad ai jingnang jingstad ïa shibun ki heprit na katei ka thaiñ.
U la ong ruh ba kane ka skul ka la long kumba ka long mynta ban pynphirang ïa ka jingnang jingstad, ka dei hi ka jingtrei shitom ki bor pynïaid skul bad ki nonghikai bad kum u MLA u khmih lynti ruh ba kane ka skulk an dang bteng ban shakri na ka bynta ban pynphriang ïa ka jingnang jingstad ha katei ka thaiñ.
Kumba la pynpaw da ki bor pynïaid skul ba kane ka skul ka dang don hapdeng shibun ki jingduna, na ka liang u MLA ka Umsning u la kular ruh ban dang ïa trei kam lang bad ban shim khia ruh ban ïa kren sha ki bor sorkar halor ki jingduna jong katei ka skul, namar ka jingdon kane ka skul ka dei hi ka thong ban kyntiew ïa ka pule ka puthi ki heprit ha katei ka shnong bad ka thaiñ, u la bynrap.
