Shillong, Kyllalyngkot 24 : Ka National Institute of Fashion Technology (NIFT) ka rakhe ïa ka Sngi ba la Seng Nongrim ïa ka ne ka Foundation Day ha NIFT Shillong, Umsawli ha ka Sngi Thohdieng bad ha kane ka jingrakhe kane ka tnad pule puthi shaphang ka riam ka beit bad ka jingpynwandur wandar (Fashion Education and Design) ka la dap artat 40 snem ha ki jingshakri jongka.
Ha kane ka jingrakhe ka kong Daphiralin Kharjana, Managing Director Meghalaya Handloom and Handicraft Development Corporation Ltd ka la long kum ka kongsan. Ka la ai khublei kitbok kitrwiang ïa ka NIFT ba kan dang kiew na uwei u snem sha uwei pat. Ka la batai ruh shaphang ka jingriewspah jongki rukom thaiñ jaiñ tynrai ha kane ka jylla.
Kum shibynta na kane ka jingrakhe la pynlong ruh ïa ka jingthung dieng hapoh ka jingïalam ka kongsan , ki Nonghikai, Nongtrei bad ki samla pule ka NIFT.
Ha kane ka jingrakhe la pynlong ruh ïa ki jingïalehkai sport, jingiakob rangoli, jingshad tynrai bad ka jingplie ïa ka NIFT Timeline Wall ha kaba la pyni ïa ki jingïaid lynti ka NIFT ha kine ki sawphew snem bala leit noh.
ïa kane ka prokram la pynlong hapoh ka jingialam u Dr Brijesh Deore Director ka NIFT uba la ai ka jingkitbok kitrwiang ha kane ka jingrakhe bad pynpaw ruh ba kum ka Institute kan dang ïai bteng ban ai ka jingshakri ban kyntiew shuh shuh ïa ka jingnang jingstad ha ka riam ka beit.
