Jowai, Lber 14: Ka North East Adventist University Church, Khliehtyrshi kala rakhe ïa ka ‘Global Youth Day’ ha une u snem da kaba pynlong ïaka prokram jingpynkhuid ‘cleaning drive’, haka jingïatreilang ka District Legal Service Authority, West Jaiñtia Hills bad ka Meghalaya State Pollution Control Board, ha kaba la pynlong ruh ïa ka workshop halor ka phang “Various Provision of Environmental Laws and Helpful Impact of Pollution and Environment Degradation” ha Community Hall Khliehtyrshi.
Shi bynta na kane ka prokram baroh ki nongwan ïashim bynta kila ïoh jingbatai halor ka khuid ka suba jong ka mei mariang, ïa kane ka prokram la pynïaid da u bah W R Kharkrang, Senior Environmental Engineer MSPCB. Ha kaba la batai bniah halor ka jingdonkam ban ïada na ka jingpynjaboh ba bun jait, ka rukom pynduna ïa ki jakhlia jakhlait khnang ban ïoh ïa ka mariang kaba khuid.
U Bah F. B Passah, Assistant Legal Aid Defence Counsel ula batai shaphang ka aiñ kaba ïada ïa ka mei mariang hapoh ka ri India katkum ka Environmental Protection Act 1986. Ula kdew ba ka Ri India ka long kaba riewspah haka jinglong kyrpang jong ka riti ka dustur bad kaba ïadei bad ka mariang.
Ula pynsngew shuh shuh halor ka jingtreikam jong ka aiñ mariang hapoh ka ri, katkum ka 42nd constitutional Amendment 1976, kaba la paw ha ka Article 48A hapoh ka Directive Principles of the State Policy (DPSP) bad Article 51A (g) jong ka Fundamental duties, kaba don ïa ka jingkitkhlieh naduh ka sorkar bad ki nongshong shnong ban ïada ïaka mariang.
Ka kong B. Majaw, Secretary ka District Legal Service Authority, Khliehtyrshi kala ai ki kyntien ai khublei, ha kane ka prokram la wan ban donlang da Dr. P. Bhaggian, Vice Chancellor NEAU, Fr. P. Shanpliang, Church poster NEAU English Church, bah P Khyriam, lecturer AHSS, ma K. Rymbai Waheh Shnong ka Khliehtyshi, ka kong F. Sari, para Legal Volunteer, nalor kiwei de.
