Rakhe ka NCC ïa ka National Space Day da kaba ïalam leit jngoh ïa ki Cadet sha ka NESAC

Shillong, Nailar 23: Ki Cadet jong ka 42 Meghalaya Bn, Shillong Group, NER Directorate NCC ki la rakhe ïa ka National Space Day ha North Eastern Space Application Centre (NESAC), hapoh ka tnat Space ha Umïam, Shillong ha ka sngi Saitjaiñ.
Ha ka jingdon kumba 35 ngut ki Senior bad Junior Wing Cadets jong ka 42 Meghalaya Battalion NCC na Khasi bad Jaiñtia Hills ka jylla Meghalaya, ki la rakhe ïa ka National Space Day 2025 da ka jingleit jngoh ïa ka North Eastern Space Applications Centre (NESAC), Umiam, Meghalaya ha ka sngi Saitjaiñ kum shi bynta na ka pule puthi.
Ïa ki cadet la batai lyngba da ki scientist jong ka NESAC halor ka bynta jong ka space technology haba ïadei bad ki jingjia ba shah lynshop ha ki bor jong ka mariang, ka jingbatai ïa ka jinglong ka suiñbneng, ki lad jingpynïasoh bad ki kam pynroi ha kine ki thaiñ. Ki la leit ruh ban jngoh ïa ki bynta ba kongsan bad ban tip ruh shaphang ki satellite application bad ki geospatial technology.
Na ka liang u Commanding Officer u la pynshai ïa ki halor ka jingdonkam jong ka science and technology ha ka ban tei ïa ka ri bad u la pynshlur ïa ki cadet ban pynïar ïa ki kam kiba ïadei bad ka bynta jong ka space. Kane ka jingleit jngoh jong ki, ka la ai mynsiem ïa ki cadet bad ban sngew sarong ruh ha ki jinglong jong ka ri India bad kumjuh ruh ban ngam jylliew ha ka jingsngewtynnad jong ki ha ki jingkiew shaphrang jong ka saïan.
Ka la long ruh ka lad kaba kongsan na ka bynta ki samla kiba dang khie na baroh kawei ka jylla Meghalaya ban ïohi ïa ki jingkiew shaphrang ba dangshen haba ïadei bad ka space application bad kane ka mut ban ai mynsiem ïa ki khynnah na ki jaka kiba sha kyndong kynshrot bad ki khynnah pule kiba wan na ki longïing kiba duk kiba kyrduh ba kin buh ka thong halor ki STEM subject.