Shillong, Nohprah 10 : Ka Meghalaya Peoples’ Human Rights Council (MPHRC) kum shibynta ban ïasnoh kti lang ha shityllup ka pyrthei, ka la pynlong ka jingkynmaw burom hynne ka sngi kum ka Sngi Rakhe ïa ka Hok Longbriew Manbriew.
Katkum ka kyrwoh na u Secretary General ka Council, Bah NJ Nongrem la ong ba dei ha kane ka sngi ha u snem 1948 ba ka Dorbar Bah jong ka Synjuk ki Ri (United Nations) ka la pdiang ban pynjari ïa ka Dulir pawnam kaba tip salonsar kum “Ka Jingpynbna-ïar Satlak ïa ki Hok Longbriew Manbriew” (Universal Declaration of Human Rights). Ka phang jong ka jingrakhe ka dei “Ka Jingburom, Ka Jinglaitluid bad Ka Jingbishar Hok”.
“Kane ka Dulir pawnam kaba tip mynta kum ka jingpynbna-ïar satlak ïa ki Hok Longbriew Manbriew ka la pynskhem ba ïa ki bynriew baroh la kha laitluid bad ki ïaryngkat ha ka burom bad ki hok kynti bad jinglaitluid khlem ka jingpynïapher la ka long kum ka jaitbynriew, ka rong ka sniehdoh, ka ktien ka thylliej ne kano kano ka jinglong,” la bynrap shuh shuh ka kyrwoh na ka MPHRC
Shuh shuh na ka liang u Bah Dino DG Dympep, Chairman ka MPHRC u la ong, “Ha kane ka sngi, ngi khot bad ngi wer ïa baroh ki paid nongshong shnong ba ngin ïai pynskhem bad ïaikut jingmut ban ïeng tylli bad ïada ïa ka Hok Longbriew Manbriew, ban ai jingkyrshan khamtam eh ïa kito ki briew kiba dang ïaksaid ban ïoh ïa ka Jingbishar Hok bad ha kajuh ka por ban pynrem jur pat ïa kito ki briew ne ki kynhun kiba ïuhroit bad pynhiar dor ïa kyrdan jong ka Hok Longbriew Manbriew kaba la pynkhamti katkum riti synshar paidbah ne da ka aiñ hi.”
Nalorkata, u ong ruh ba ki ai ka burom ba kyrpang khamtam eh ïa ka jingnud bad ka jingshlur jong ki riew shimet, ki nongtrei monsngewbha, ki seng bhalang kiba ju mih shakhmat khlem jingtieng ne jingsmiej ban kren bad ïaksaid ïa ki mat kiba ktah ïa ka hok paidbah ha kane ka jylla, la ka long da ka lynti jong ka jingïasaid ban pynshongnia lyngba ki jingïakhih kiba jai jai bad ka basuk basaiñ.
“Ngi ïai ai ka jingkyrshan kaba pura ïa kiba paidbah ka shnong Mukroh kiba la dawa ban pynïoh ïa ka jingbishar hok khamtam eh na ka bynta kito ki briew kiba la ngat ha ka jingshah sait ïap bad mynsaw jur bad shah pynkheiñ, shah ïuhroit ïa la ka Hok Longbriew Manbriew ha ka kti ki Pulit Assam. Halor kane ka jingjia kaba sngewsih ngi ban jur ba ka sorkar Meghalaya bad ka Assam ki dei ban pynïoh mardor ïa ka Jingbishar Hok sha ki bahaïing hasem jong kitei kiba la khlad noh bad kiba mynsaw bad ban pyntikna ba ki paidbah ka shnong Mukhroh kin lah pat ban ïoh ïa ka lad ban im suk, im saiñ kumba marïaryngkat lang salonsar” ong ka MPHRC.
Ka kyrwoh ka ong ruh ba ki pynrem jur ïa baroh ki kam sniew bad ka jingïakhih kiba la jia shen ha ka jylla khamtam eh ba ki la don bun ngut ki riew shimet kiba la ngat ha ki jingjia kiba khlem poi pyrkhat la ka dei ïa ki paid trai ri muluk, ki jait bynriew ritpaid ne kino kino ki kynhun bad khamtam eh ïa ka jingshah ktah kti jong ki nongthoh khubor.
“Ha kum kine ki jingjia ka Sorkar ka dei pynlong da ki jingtohkit kaba bniah khnang ba ki briew kiba ngat ha kum kita ki apot kin lah pat ban ïoh ïa ka jingbishar kaba hok,” ong ka MPHRC.
Ka kyrwoh ka ong ruh ba ki kynmaw kyrpang ruh ïa ka jingshah siat ïap jong u Bah Cheristerfield Thangkhiew ha ki kynhun jong ki Pulit ha ka 13 Tarik u Nailar 2021. “Ngi dawa jur na ka Sorkar ba haba ka don kano kano ka jingshah kynnoh ba ka don ka jingthombor bad ka jingshah ïuhroit ïa ka Hok Longbriew Manbriew ïa kum kita ki jingshah kynnoh dei ban pynlong da ka jingtohkit kaba khlem ïa shah liang bad haba lap ïa kino kino ki briew Sorkar ba ki long ki nongpynkheiñ aiñ ka dei ban pynsaja mardor ïa ki,” la bynrap biang.
U kyntu ruh ïa ka Commission jong ka sorkar ba kam dei ban shu shong khli kti bad ban shu peitkai ïa baroh ki jingjia kiba ïadei bad ka jingthombor ïa ka hok Longbriew Manbriew, hynrei ka dei ban shim khia mardor ïa ki sienjam ban pynlong ïa ka jingtohkit khnang ba kan don ka jingbishar hok ïa kita ki kam thombor kiba ju leh da ki kynhun pulit bad ki briew Sorkar.
