Shillong, Jylliew 30 : Ka Mylliem Lum Sports Association ka la rakhe ïa ka lyngkhuh 10 snem jong ka ha ka 29 tarik Jylliew, 2022 ha Mawkhar Mylliem. Ka jingplie pyrda ïa kane ka lyngkhuh la wan ban sakhi da u MLA ka thaiñ u ba long ruh u myntri sorkar, u Bah Hamletson Dohling kum u kongsan.
Haba ai jingkren ha kane ka sngi, u kongsan u la ai ka jingïaroh ïa ka Association ha kaba ka la leh bun ki kam na ka bynta ka imlang ka sahlang bad khamtam ha kaban kyntiew ia ki samla ka thaiñ ha ka liang ki jingïalehkai.
U bah Dohling u la ong “Kum uwei na ki nongseng ïa ka Mylliem Lum Sports Association ha u snem 2012, nga dap da ka mynsiem kaba sngewkmen ban ïohi ba ka Association kala kot pat sha une u mawmer, ka jingdap 10 snem, kumba nga la ju ïaidon ngan dang ïaidon ryngkat bad ka Association ha kaban kyntiew ym tang ïa ki kam jingïalehkai hynrei wat ha ka pule puthi, ka rep ka riang bad ha kino kino ki kam kaban wanrah ia ka roi ka por hapoh ki shnong ki thaw bad ha ka thaiñ hi baroh kawei.”
U bah Dohling u la ai ruh ka jingkhublei kitbok kitrwiang ïa ka Association ba kan dang lah ban pyntyllun ïa ki kam kiba bha jongka kumjuh ruh ba kan dang lah ban ïai theh ïa u synniang ha ka thaiñ hi baroh kawei.
Ha kane ka sngi la ïadon lang ruh ki riew rangbah, ki longkmie bad ki samla ka thaiñ kumjuh ruh ki nongkitkam kiba rim bad kiba mynta jong ka Association.
