Nongpoh, Nohprah 11: Ka Meghalaya Human Rights Commission ryngkat bad ka bor district jong ka Ri-Bhoi haka sngi Saitjaiñ kila pynlong ïaka jingrakhe sngi jong ka hok longbriew manbriew ne ka International Human Rights Day halor ka phang “Dignity, Freedom and Justice for all” haka jingïalang bala pynlong ha District Library.
Ha katei ka sngi la wan ruh ban shim bynta da u Justice Aftab Hussain Saikia (Retd) Chairperson barim jong ka Meghalaya Human Rights Commission kum u kongsan haka jingdonlang u PJP Hanaman dkhot jong ka MHRC, Shillong, T Lyngwa Secretary ka MHRC, u Arpit Upadhyay Deputy Commissioner ka Ri-Bhoi ryngkat bad 3 ngut ki Resource Person ba kynthup ï aka Umeshwari Dkhar Asst. Professor ka Shillong Law College, Nitin Khera Advocate ka Meghalaya High Court, bad u CM Adhikari President ka Ri-Bhoi Bar Association.
Haba kren ha katei ka sngi naka liang u Justice Aftab Hussain Saikia u la ïathuh ba ïaka sngi jong ka hok longbriew manbriew ne ka Human Right Day la ju rakhe man u snem haka 10 tarik Nohprah bad mynta u snem 2022 kadei ka jingdap 75 snem jong ka Universal Declaration of Human Rights (UDHR) naduh bala sdang ïaka ha u snem 1948.
U la ong ruh ba ka hok longbriew manbriew ka dei kaba donkam bha ha u bynriew ban im ha kane ka sla pyrthei da kaba ban jur ruh halor ka jingkajuh salonsar u bynriew, ka jinglaitluid bad ka hok kumba la pynkupbor haka riti synshar ka ri India, da kaba ai mynsiem ruh ïaki samla pule ha katei ka sngi ba kin long ki samla kiba shlur bad trei shitom haka jingim jong ki ban tip ïaka burom jong ki kmie ki kpa, ki bahalor bad khamtam ban pyniar ïaka jingmut jingpyrkhat bad ka jabieng da kaba pynmlien ban pule ïaki kot man ka sngi.
La pynphuh pynphieng ruh ha katei ka sngi da ki jingrwai bad jingshad bala shim bynta da ki samla pule naki skul bad college bapher bapher ka Ri-Bhoi District bad ki SHGs.
