Shillong, Nailur 02: Ka Mawkhar Christian Higher Secondary School, Shillong ha ka sngi Thohdieng ka la rakhe ïa ka jingdap ba 131 snem ïa ka jingsdang ïa ka bad ruh ïa ka lyngkhuh snem ba 10 ïa ka jingsdang jong ka kyrdan Higher Secondary ha kane ka skul.
Ha kane ka sngi la wan sakhi lang da u Symbud Myntri Rangbah ka jylla u Bah Prestone Tynsong uba la pyndep ruh ïa ka jingpule matrik na kane ka skul ha u snem 1983, u MLA ka North Shillong u Bah Adelbert Nongrum kum u synbud kongsan ha ryngkat ka jingïadonlang u Pastor SS Majaw u President ka Governing Body ka skul, ka District School Education Officer ka Kong M Lyngwa, u Pastor ER Kharkrang, U Babu RS Synrem Principal ba rim, ryngkat ki nonghikai ba ki khynnah skul nalor kiwei pat ki nongshah khot sngewbha.
Haba ai jingkren kum u Kongsan bad u khynnah skul barim u Bah Prestone u la ong ba kum ka skul ka dei ban pyrshang ban ïohbat biang ïa ka jingkhraw nam kumba ka ju ïoh ha ki por ba mynshuwa kata shuwa u snem 1990 namar ha kito ki por kane ka skul ka la dei kawei na ki skul kiba paw tam ha Shillong.
“Mynshuwa ha ka por jong ngi lada ong ba ngi dei na Mawkhar Christian wat ki khynnah skul ki skul ba paw mynta kum ka St Anthony’s ne St Edmund’s ki kyiuh that that namar ki tip ba ki khynnah jong kane ka skul ki dei kiba proh jabieng bad kiba khlain ka bormet” u la ong.
“Naduh u snem 1987 shakhmat ngam ju bna shuh ba ki khynnah skul kin rung ha ka thup ki khynnah ba poi sha khmat tam ha ki eksamin, ka dei ka kamram jong ka skul bad jong ki khynnah pule ban trei shitom ban ïoh bat biang ïa kane ka nam ba ka ju bat mynshuwa” u la ong.
U Bah Adelbert ha ka jingkren jong u, u la khot la wer ïa ki samla pule baroh ba kin durut khui ha ka jingpule khnang ba ka lawei ka ri kan long kaba shngaiñ lyngba jong ki.
“Ngim dei shuh jong ka lawei hynrei ki jong ka mynta, bad ka mynnor hi ka la leit ngim lah leh eiei shuh, hynrei maphi keiñ ki samla pule ba mynta phi dei ka lawei ka ri bad ka jaidbynriew. Kumno phi im bad kaei phi leh mynta kan rai ïa ka lawei jong ka jylla” ong u Bah Adelbert Nongrum bad u la bynrap, “Phi dei ka snam, ki thied snam bad u klong snam ka jaidbynriew kynmaw ïa kane ka wei ba phi dei ka jingim jong ka jaidbynriew ba lada phim im bha ka lawei jong ka jaidbynriew ruh ka dei kaba dum”
Na ka liang u President jong ka Governinbg Body jong ka skul bad u Pastor SS Majaw u la pynkynmaw biang ïa ka dorkhas ba ka skul ka la aiti sha ka sorkar ban ïarap bei tyngka na bynta ban tei thymmai ïa ka iingskul ba la jot rathai kaba kot sha ka 1.3 klur tam eiei. U Bah Prestone u la kular ba na ka liang jong u kum u khynnah skul barim bad u riew shimet un wad ïa ka synïang na ki para khynnah skul ha kito ki por kiba la pyndep ïa ka jingpule na ka ne ka skul bad u la kular ban pynpoi ïa ka synïang ba 10 lak tyngka. Ha kane ka sngi na ka liang ka skul ka la pyrto ruh ïa ki nongmihkhamt kiba la synïang sha ka skul khamtam eh ïa u MLA ba mynta uba la mang na ka MLA skhim ban tei ïa ka kynroh jong ka hostel.
Ha kane ka sngi ka skul ka la pynkup burom ruh ïa ki khynnah skul kiba wan shakhmat ha ka jingpule bad ïa ki nonghikai kiba la shakri palat ïa ka 25 snem bad ka jingpyni ïa ki dur bad ki khana jong ka jingïaid lynti jong kane ka skul.
