Nongpoh, Nohprah 06: Ka kynhun ki nongrep na Ri Bhoi District ha ka lama jong ka Ri Laong Farmers Produce Organization ryngkat ka jingïatrei lang bad ka College of Postgraduate Studies in Agriculture Sciences (CPGSAS), Umiam ki la pynlong ïa ka jingrakhe ba kyrpang ïa kata ka “World Soil Day’ kumba la rakhe ha kylleng ki ri ka pyrthei.
Ïa kane ka jingrakhe ïa ka World Soil day la pynlong ha Pahamsohthri, Nongpoh ha ka 5 tarik u Nohprah 2023, kaba dei ha ka jingïalam ka Kong Marian Maring kum ka President, u P.S Toor, Vice president ryngkat kiwei kiwei ki nongïalam ka kynhun bad ki nongrep na kylleng ka thaiñ Nongpoh.
Ha kane ka sngi, ki riewshemphang ha ka rep ka riang na ka College of Postgraduate Studies in Agriculture Sciences (CPGSAS), Umiam ba kynthup naduh u Dr. Sanjay Swami, Dr. A.K Singh, Dr. Vishram Ram, bad u Dr. Ram Singh ki la wan ban shim bynta bad ai ruh ka jinghikai sha ki nongrep halor ka jingkordor ka ka khyndew ba ngi donkam ban sumar bad ban ïada ïa ka khyndew kaba long ka tynrai jingim jong ki nongrep.
Ha kane ka sngi, la sam ruh ïa ki symbai tyrso bad kiwei ki symbai jhur sha ki nongrep bad la aiti ruh ïa ki tar rep ban pyndonkam ki nongrep ha ka rep ka riang.
Lyngba jong kane ka sngi ba la rakhe kyrpang ïa kane ka World Soil Day, kitei ki riew shemphang ha ka rep ka riang ka la ai jinghikai ym tang kumno ban kyntiew ïa ki nongrep ha ka kam rep ka kam riang, hynrei lyngba jong kane ka sngi ki la ai ruh ka jinghikai ba kyrpang kumno ban pyndonkam ïa ka khyndew bad ruh ba ki nongrep ki dei ban ïada kyrpang ïa ka khyndew, kaba dei kawei na ka tynrai jong ka jingim jongki ha ka kam rep ka kam riang.
