Shillong, Nailur :Ka Krishi Vigyan Kendra (KVK), West Khasi Hills ka la rakhe ïa “Rashtriya Poshan Maa” ha ka 15 tarik mynta u bnai ha KVK, Nongshillong.
Ha kane ka prokram la wan ïashim bynta da ki dkhot jong ki ar tylli ki Farmer Producer Organization (FPO), ‘Ka thup ki nongrep Producer Co-operative Society Limited’ na ka shnong Pariong, ‘U Shang ki Nongrep’ na ka shnong Nongthliew bad ka Roilang Soceity na ka shnong Mawkynbat, Eastern West Khasi Hills District. La don ryngkat ruh samla pule jong ka College of Agriculture, Kyrdemkulai, Ri-Bhoi District, Meghalaya kiba pyndep ïa ka Rural Agricultural Work Experience (RAWE).
I Kong L. Warjri, Senior Scientist & Head of Krishi Vigyan Kendra I la ai ïa ka jingkren pdiang ha kaba I la pynshai shaphang Flagship programme jong ka Sorkar India ka POSHAN Abhiyaan ba la ai ka theme “Nutrition rich India, Educated India, Empowered India”.
Nalor kata I la kren halor ka jingdonkam ban bam ki jingbam ba tei ha baroh ki bynta jong ka jingim u briew khnang ban pyllait na ki jingpang ba ïadei bad ka jingduna ki vitamin bad jingduna snam. I la kyntu ïa ki nongshim bynta ban bam bha ïa ki jhur khlaw bapher bapher kiba lah ban ïoh na jaka bad ki thaiñ lajong bad ban pynduna ïa ki jait jingbam ba remdor bad ki jait jingbam GMO. I la ban bniah ruh ba ka pule puthi bad ka jingkyrshan jong ki dkhot hapoh ki longïing ka long kaba donkam shibun ban pynpoi sha ka thong jong kane ka campaign.
Ha kane ka sngi la ai jinghikai ha ka technical session lyngba ki presentation ha kaba la ai lad ïa ki nongshim bynta ban ïamir jingmut bad ïa tai nia ba kham bniah. Ha kaba pynkut la sam ïa ki symbai jhur sha ki nongshim bynta bad pynlong ïa ka jingleit jngoh ïa ka KVK Farm.
