Khliehriat Risaw 01: Ka Khliehriat Puja Committee East Jaiñtia Hills District ha kane ka jingleh niam bad lehkmen Durga puja kaba mynta u snem ka la rakhe kyrpang ruh ïa ka jingdap sanphew snem ka Sarbojanin Durga Puja Committee Khlehriat namar ïa kane ka puja la sdang nyngkong eh ha u snem 1975 ha Khliehriat bad mynta u snem ka la kynjoh sha ka sanphew snem bad kumta la rakhe ïa ka jubili ksiar ne ka Golden Jubili jong kane ka puja committee ha Khliehriat.
Kum shinynta jong ka jingrakhe ïa ka jubili ksiar jong ka Khliehriat Puja Committee mynta ka sngi ka kong Monmaia Lyngdoh ka la ot ïa u cake jong ka jubili ksiar ne Golden Jubili ha kaba la ïa don ryngkat lang ki nongkitkam bad ki dkhot jong ka Sarbojanin Durga Puja Committee Khlehriat East Jaiñtia Hills District ba kynthup u President, u Saibol Das, Secretary bah Rajesh Lyngdoh, ki dkhot ba kynthup u Rakhal Dev nath, u Dharmindre Kumar, ki riew ngeit niam hindi bad kiwei kiwei, ha kane ka sngi ha ka por janmiet la wan ruh ban pynshongshit ïa kane ka jinglehniam bad jingrakhe juili da ka kynhun tem bad kynhun shad, ka Bipasa Musical Group kaba na ka nongbah Kolkata.
Haba kren sha ki pathai khubor, u Secretary jong ka Sarbojini Durga Puja Committee Khliehriat East Jaiñtia Hills District, u bah Rajesh Lyngdoh u la ai khublei ïa ka blei Durga bad kyrpad ha ka blei ban don ryngkat ban ioh ruh ïa ka shongsuk shongsaiñ ha sla pyrthei u la ong ruh ba dei naduh u snem 1975 la sdang ban leh ïa kane ka puja ne ka Sarbojanin Durga Puja ha Khliehriat bad ha shwa jong u snem 1975 ki paidbah riew ngeit hindu kiba na Khliehriat bad ki shnong ba mar jan ki ju leit shaduh Nartiang ban leh niam Durga Puja bad u la ai khublei ruh ïa baroh ki nongshong shnong ban ioh ïa ka shongsuk shongsaiñ.
Shuh shuh la sakhi ruh ba ha kane ka jingleh niam Sarbojanin Durga Puja ha Khlehriat ki pandit ki la leh ïa ki jingkñia baroh bad la pynlong ruh ïa ka jingot blang kum shibynta jong ka jinglehniam, ka la don ruh ka jingia bam sngewbha jong ki riew ngeit hindu ha kane ka jaka ba pynlong puja ha Khliehriat bad ka jinglehniam bad ka jingleh kmen puja ka iaid beit iaid ryntih ha ka suk ka saiñ.
