Shillong, Nailur 04 : Ka Khasi National Dorbar ha ka sngi Nyngkong ka la rakhe ïa ka jingdap 100 snem ka jingshakri jong ka ha ka jingïalang kaba long ha Khasi National Dorbar Hall kaba don ha Mawkhar ha ka rukom kaba i shongkun bha.
La donlang ruh ha kane ka sngi naduh u Symbud Myntri Rangbah ka Jylla, Bah Prestone Tynsong kum u Kongsan ryngkat ka jingdonlang ki MLA na ka Voice of the People’ Party (VPP) nangta ki Syiem bad ki Khlieh Nongsynshar, ki nonghikai bad ki samla pule na ki skul bapher bapher.
Haba kren ha katei ka jingïalang, u Kongsan u la ai ka burom ïa ka jingïohi jngai ki longshwa kiba da don shisha ka jingkitkhlieh. U la pynkynmaw ruh ba kumno na bynta ka jingïalang kaba lai sngi ki hap ban ïaid pat da ka kjat haduh shi taiew nalorkata ban song hi laka jong ka ja. “Ban mangi tharai mynta lada ym ïoh bai tiket ym lah ban leit. Haduh katta ka jingkordor jong kine ki riewrangbah bad ki longkmie ban ïalum lang kawei bad ka kyrteng ka long ka Khasi National Dorbar,” u la ong.
Shuh shuh u ong ruh ba dei lyngba ka jabieng ba nep jong kitei ki riew rangbah ba la ïoh ïa ka jinglaitluid bad ïoh ruh ban synshar dalade ïalade tad haduh ban da ïoh la ka jong ka jylla.
Ha kajuh ka por, u Bah Prestone ula kyntu ruh ïa baroh ki nongïalam jong ka Dorbar ba kin nang ïai pynkhlain shuh shuh. “Ai ba kane ka Khasi National Dorbar kan long kaba treikam bha ym ban kynjah jar jar. Ki Syiem jongngi ki dang don bad mynta ka sngi kiba bun ki don hangne nga sngew ban ong balei ym lah ban ïa ïaid ryngkat lyngba kane ka shatri kaba ngi ong ka Khasi National Dorbar tylli mlon kawei ban pynkhlain shuh shuh,” u la bynrap biang.
La ïoh ruh ïa ka jingkren na u paiem Ainam Manik Syiem kum u Symbud Kongsan nalor kiwei kiwei.
Ha shwa kane, u Symbud Myntri Rangbah u la pynkup burom ruh ïa u Secretary ba rim tam jong ka Dorbar, u Bah J. Kerrsingh Tariang bad pyllait paidbah ruh ia ka kot sah kynmaw jong ka Khasi National Dorbar ba ai kyrteng da ka – ‘Khasi National Dorbar, Ki Kam bad ka Seng Pyrkhat jong ka’.
Shwa ban sdang ka jingialang, u Kongsan ryngkat ki nongïalam ka Dorbar ki la pynher ruh ïa ka lama bad plie ïa u mawsah kynmaw hakhmat ka Iing Dorbar bud pat sa ka jingplie ïa ka jingpyni nam ïa ki dur bad ki jingdro kiba rim ha kamra seminar.
