Shillong, Nailar 07: Ka tnat Textiles, ka sorkar jylla, ka la rakhe ïa ka National Handloom Day ha ka sngi palei halor ka jingïoh ïa ka Geographical Indication (GI) tagged ha ki ar tylli ki jaiñ kiba kynthup ïa ki jaiñ ba la thaiñ da u ksai Ryndia bad ki tiar ba la shna da ka kti.
Ha kane ka sngi na ka liang jong u Lat ka jylla u C. H. Vijayashankar, kum u kongsan u la ong ba kane ka dei ka kam kaba pynpaw ka jingsarong ïa ka jylla ha kaba ïadei bad kane ka ïoh burom jong ka jylla. Na ka liang jong u ula banjur ruh halor ka jingdonkam ban ïoh ki jingkyrshan na ka bynta ki kam kiba ïadei bad ki tiar kiba shna da ki kti ha ka jylla. “Kane kan dei ka jingrakhe kaba khraw ïa ka jylla ha kaba kane ka jingïoh jingithuh lyngba ka GI tagged na ka bynta u Ryndia bad ki jingshna da ki kti ka pyni ïa ka jinglong kaba kyrpang jong ki khasi ha kaba ïadei bad kane ka bynta,” ong u Lat ka jylla.
U la pynkynmaw ruh ïa ka jingthmu jong u Myntri Rangbah ka ri u Narendra Modi uba la ai ka jingïaroh ïa u ksai Ryndia, uba dei uba kyrpang ha ka jylla Meghalaya. “Mynta ka sngi ki la don kumba 40,000 ngut ki nongrep bad palat 42,000 ki riew shimet ki la don bynta ha ka kam handloom bad khambun hi ki dei ki longkmie,” u la bynrap.
Na ka liang jong u Lat u la ai ruh ka jingïaroh ïa u Myntri Rangbah ka jylla u Conrad K. Sangma bad u Myntri ka Textiles u Bah Paul Lyngdoh ba ki la lah ban kyntiew ïa kane ka tnat bad ki briew jong ka jylla.
Haba kren ha kane ka sngi na ka liang u Bah Paul Lyngdoh u la pynpaw ïa ka jingkmen halor kane ka jingïoh jingithuh jong ka tnat ha kaba kane ka la ïarap ïa ka tnat ban kyntiew ïa ki kam na ka por sha ka por
U la ai khublei ïa Dr. Rajanikant, ba la trei shitom ban pynïoh ïa ka GI tag na ka bynta kine ki jingpynmih kiba dei kiba kongsan bha ïa ka jylla baroh kawei.
Kum shi bynta na kane ka jingrakhe u Myntri u la pynlait ruh ïa ka website ba thymmai kaba la ai kyrteng da ka “KHNENG – Woven with Heritage, Worn with Pride”, bad la pynlait ruh ïa ka cover, “Looms to Legacy”. Ha kane ka sngi la sam ruh ïa ki State Handloom Awards sha ki artisan na ki district bapher bapher jong ka jylla Meghalaya.
