Shillong, Lber 08: Da ka jingthmu ban kyntiew ïa ka jingpynsngewthuh ha kaba ïadei bad ka poi jingpoi ki kynthei ha ka sngi burom ki longkmie, ka MLA jong ka Gambegre ka Dr Mehtab Chandee A Sangma ka la sdang ïa ka jingïalap ne ka Campaign da kaba pynlong ïa bun tylli ki prokram ha ki skul kiba don ha Gambegre.
Kane ka Menstrual Campaign kadei shi bynta jong ka International Women’s Day halor ka phang “Accelerate Action” bad ïa kane ka Campaign la kyrshan lyngba ka Chief Minister’s Special Grant (CMSG) da ka jingthmu ban pynsngewthuh ïa ki khynnah kynthei ban long kiba leh khuid leh suba bad ban sumar bha ïalade.
Ïa kane ka prokram la pynlong ha Mellim Deficit Secondary School ha South West Garo Hills District ha kaba palat 120 ngut ki khynnah skul kila wan ïashim bynta bad la pynlong ruh ïa katei ka prokram ha Daren Agal Secondary School, Kherapara UP Secondary School, Gonchudare Secondary School bad Gambegre UP Secondary School.
Ha ka sngi Saitjaiñ la sam kumba 1000 tylli ki Reusable Pad bad kane ka Campaign kan ïai bteng kum ka jingrakhe ïa ka International Women’s Day bad la buh thong ban sam ïa ki Reusable Pad sha palat 10000 ngut ki kynthei bad ki longkmie kiba dei ki nongïoh jingmyntoi.
“Kane ka campaign kan ai jinghikai ïa ki khynnah skul bad ïa ki samla kynthei ban shim ïa ki lad ki lynti bad ban sumar sukher bha ïalade haba ki ïaid shaphrang ban jam sha ka jinglong kynthei ba pura,” ong ka Dr Mehtab Sangma.
“Ka prorkam kan pynleit jingmut ha ka ban shimkhia ïa ki mat kiba kongsan kiba ïadei bad ka menstrual hygiene, khamtam eh na ka bynta ki khynnah kynthei kiba don ha ka rta 11-18 snem, kiba shong ha ka Klas VI haduh X,” ka la ong.
Nalor ka jingsam ïa ki Reusable Pad la ai jingbatai ruh ïa ki khynnah kynthei kumno ba kin pyndonkam bad la ai jingbatai ruh ha ka ktien tynrai khnang ba kin lah ban sngewthuh bha bad la sam ruh ïa ki kot ka ban batai ban pynsngewthuh ba kin lah ban sumar bha ïalade.
Ïa kitei ki Reusable Pads la shna da ka Shubham Charitable Association, Shillong, ha kaba da ki spah ngut ki kynthei kila donkti ha ka ban shna ïa kine ki pad.
