Rakhe ka EJH ïa ka sngikha ba 150 snem u Sardar Vallabhbhai Patel da ka Unity March

Khliehriat, Naiwieng, 14: Kum shibynta jong ka jingrakhe ïa ka sngikha ba 150 jong u Sardar Vallabhbhai Patel bad ruh ban kyntiew ïa ka mynsiem ïa tylli bad kyntiew ïa ka ri kum ka ri kaba dap biang nalade ne ka Ek Bharat-Aatmanirbhar Bharat (One India, Self-reliant India), ki bor district jong ka East Jaiñtia hills District ha ryngkat ka jingïatreilang bad ka ophis jong u District School Education Officer (DSEO), East Jaiñtia Hills District ka la pynlong ïa ka prokram ba kyrpang kaba ki khot ka Unity March (Padyatra), ïa ka jingïaod la sdang na ophis u Deputy Commissioner Khliehriat bad pynkut ha Khliehriat Higher Secondary School bad ïa ka prokram la pynlong ha hall jong ka Khliehriat Higher Secondary School.
Haba kren ha ka jingïalang u Sub-Divisional Officer (SDO)- Sadar, East Jaiñtia Hills District, u Manish Kumar, IAS u la kren maitphang halor kane ka jingrakhe ïa ka jingdap 150 jong u Sardar Vallabhbhai Patel, uba dei uwei na ki nongïaleh laitluid bad u nongsaiñdur ne architect jong ka jingïatylli ha ka ri India, u la ong ba ka long kaba donkam ban bud nuksa na ki jingim jong u Sardar Patel, kum ka jingïohi jngai jong u, ka jingtreishitom jong u, kiba donkam ban bud nuksa ban kyntiew ïa ka ri baroh kawei.
U Manish Kumar u la ong ruh ba ka ri India kam dei tang kata ka ri kaba don ka jingitynnad ha ki lum ki wah ne ka geographical territory bad ka jingdon bunjait ki jaitbynriew hynrei ka dei ruh ka ri kaba don ka jingsngew burom iwei ïa iwei, kaba don la ka dor bad kaba don ki khanatang kiba don nam, shuh shuh kumban pynphalang ïa kito ki por ba ka India ka dang ïakhun ban ïoh ïa ka jinglaitluid u SDO-Sadar u la kren halor ka jingdonkam ban long kiba ïaishah, kiba treishitom bad kiba don kata ka dor bad ka mynsiem ban ïarap ïa kiwei ban jop ha ki jingïaleh, u kren ruh halor ka ka dor jong ka jingïatylli kumba u Sardar Patel u la maitlynti.
U Kumar, u la kren ruh shaphang ka jingkhlaiñ ka ri India da kaba ai nuksa na ka Mehhalaya bad ki jaka kiba na ka thaiñ shatei lam mihngi kiba don bun jait ki jinglong tynrai ne ki lariti bapher bapher , ki jingngeit, bun jait ki jait ktien , u kren ruh halor ka jingdon ka jingkitkhlieh kiba dei ki hok jong ki, u kyntu ïa baroh ban long kiba don ka jingburom ïa ka jinglong tynrai, ka lariti bad ka jingngeit jong iwei pa iwei bad ban burom ruh ïa ka ktien ba kren, u kyntu ïa ki khynnah skul bad kin shim nuksa na ka jingim bad jinglong jong utei u ‘riew khraw jong ka ri, u Sardar Patel.
Ha kane ka prokram la ïoh ruh ïa ka jingpule lang ïa ki kyntien jingkular ne ka pledge ba la ïalam da u Manish Kumar, IAS, kaba kren halor ka jingdonkam ban don ka jingkitkhlieh ban trei na ka bynta ka jingbit, jingdap biang ka ri kaba tip kum ka Aatmanirbhar Bharat (Self-Reliant India).
Shuh shuh la ïoh ruh ïa ki jingshad tynrai, ki jingrwai tynrai na ki khynnah skul kaba pyni ïa ka jingriewspah ha ka riti ka durtur bad ka lariti.
Ïa ka lama lao ring ha kane ka jingïaid ‘Unity March’ la pyllait da u Sub-Divisional Officer (SDO)-Sadar, East Jaiñtia Hills District, u Manish Kumar, IAS ba la ïa shim bynta lang ruh ha ka jingïaid da ki khynnah skul kiba la rah ïa ka lama lai rong jong ka ri kaba pyni ïa ka jingïalong shitylli kum ki nongshong shong jong ka ri India.
Kiba la ïa don lang ha kanr ka prokram ki kynthup ruh u District School Education Officer, East Jaiñtia Hills District, u bah R. Diengdoh, u Principal jong ka Jaiñtia Eastern College (JEC), Khliehriat, u Dr. P Nongtdu, ki nonghikai bad ki khynnah skul kiba na ki skul bapher bapher kiba don hapoh ka district.