Rakhe ka Eastern West Khasi Hills District ïa ka jingdap 4 snem ka jingïoh District

Mairang, Naiwieng 10: Ka District Administration Eastern West Khasi Hills District, mynta ka sngi ka la rakhe ïa ka jingdap saw snem jong ka jingïoh ïa la ka jong ka District kaba pura kata ka Eastern West Khasi Hills District, kaba la tip ruh kum ka 4th District Foundation Day, ha ka jingïalang ba la pynlong hapoh Multipurpose Hall DC Office Mairang.
Ha kane ka sngi rakhe la wan ban ïadonlang u Myntri ka tnad power and Water Resources ka sorkar Jylla u bah Metbah Lyngdoh, u ba dei ruh u MLA ka Mairang kum u kongsan ha ryngkat ka jingïadonlang u MLA ka Mawthadraishan u bah Shakliar Warjri, u MDC ka Mawthadraishan bah Powell Sohkhlet, ka Deputy Commissioner ka kong Anita Kharpor kiwei ki Ophisar sorkar ki nonghikai ki khynnah skul bad kiwei kiba la shah khot sngewbha.
U bah Metbah ha ka jingkren kum u kongsan u la ong ba tang ban ïoh ïa ka district kam pat biang pura, hynrei ban wanrah ïa ka jingdonkam jong u paidbah hapoh ka district kum ka jingdon ki ophis sorkar ba pura hapoh ka district.
U la pynkynmaw ïa ka jingïaid lynti jong ka district 45 tylli ki snem kum ka Sub-Division tad haduh ban da ïoh ïa ka district ba pura. U ai khublei ïa ki nongshong shnong, ki riew pawkhmat na ka district ki ba la ïalam lynti ban ïoh ïa ka district ba pura.
U la bynrap ruh ïa ka jingdonkam ban don ïa ka mynsiem ka jingïatreilang ha baroh ki liang khnang ban lah ban pynkiew ïaka roi ka par hapoh ka district.
Ha kawei ka liang, u la ai khublei kyrpang ïa baroh ki khynnah skul kiba la ïoh khusnam ïa ka jingwanrah burom jong ki ïa ka district bad ka thaiñ baroh kawei. U la ai mynsiem ïa ki ba kin dang trei shitom shuh shuh.
U la kyntu ruh ïa kito kiba wan na ki longïing ba duk ba kin nym kynran dien wat hapdeng ka jingkhanglad na ka jingduk, hynrei ban ïai bteng ïa ka jingpule jong ki tad haduh ba kin da ïoh ban kiew ha ki kyrdan ba hajrong kaba long ka nam ka burom ïa ka ïing ka sem, ka shnong bad ka skul.
U la ban jur ïa ki khun samla shynrang bad kynthei ban kiar na kino kino ki jinglong ba sniew kiba pynjot ïa ka lawei jong ki.
Ha kane ka sngi la ïoh ban pynkup burom bad sam ruh ïa ki khusnam sha ki samla pule jong ka thaiñ, kiba wan sha khmat ha ka jingpule ha ka SSLC bad HSSLC jong u snem 2024 bad 2025.
La pynphuh pynphieng ïa kane ka jingrakhe dap 4 snem pura ka district da ki jingshad bad ki jingrwai na ki samla jong kane ka dong ka thaiñ bad ruh da ka jingïakop kyntip.