Nongpoh, Jylliew 06: Ka District Project Management Unit, Meghalaya Basin Management Agency ryngkat ka jingïatreilang bad ka bor district jong ka Ri-Bhoi mynta ka sngi kila shim bynta ban rakhe ïaka sngi pynneh mariang ne ka World Environment Day ha ka jingïalang kaba la long ha District Library ha Nongpoh.
Ha shuwa katei ka prokram naka liang ka tnad Basin kala pynlong ruh ka jingthung dieng haki rud ki kiar bad ki sawdong sawkun jong ka Science Hall ha Nongpoh naka bynta ban hiskai sha ki paidbah ban pynneh pynsah ïaki dieng bad ka mei mariang ha kaba u Bah Mayral Born Syiem MLA ka Nongpoh u la shim bynta kum u kongsan haka jingdonlang u Bah MB Tongper Additional Deputy Commissioner ka Ri-Bhoi District bad kiwei kiwei ki ophisar naka tnad Basin, haka jingdonlang ki khynnah skul kiba la shim bynta haki jingïakop bapher bapher naduh ka dro dur, ka science exhibition, debate bad kiwei kiwei.
Haba kren ha katei ka sngi naka liang u Bah Mayral Born Syiem MLA ka Nongpoh u la pynpaw ka jingsngewkmen bad ai ka jingïaroh ïaka tnad DPMU, Meghalaya Basin Management Agency kaba la shim ïaka sienjam ban pynlong bad rakhe ïaka sngi pynneh mariang da ka jingangnud ban sumar bad ban pynjyrngam biang ïaka mei mariang bad ban pyndonkam ruh katkum ki juk stad ba mynta ban lait naka jingpynjaboh ïaka mei mariang ha kaba kum ki khynnah skul naki skul bapher bapher kila shim bynta ban pyni ïala ki jong ki rukom shna bala pynwandur katkum ka juk stad kaba mynta haka jingïakop science exhibition.
“Ka long kaba donkam ban pynneh pynsah bad sumar ïaka mei mariang, kumba ngi la skahi ha kine ki sngi ba ka jingpynjot ïaka mei mariang ka long kaba shyrkhei ha kaba ka jingmut jingpyrkhat jong kiba bun haka imlang ka sahlang kam don shuh ban dang syrdep ïaka jingjot jingpei, hynrei tang ka khwan myntoi ban pynjot ïa kiba bun ki mar poh khyndew ki dieng ki siej bad kiwei kiwei ki jingai jong ka mei mariang” u la ong.
U la ai mynsiem ruh ïaki paidbah bad ki khynnah skul ha katei ka sngi ba ki dei ban long ki nuksa sha ki shnong ki thaw, ban wanrah ïaka rukom pyrkhat kaba thymmai wat lada ngi donkam ban pom ïaki dieng naka bynta ka jingdonkam, hynrei ngim dei pat ban klet ban thung thymmai bad ban bujli ïaki khnang ba ka mei mariang kan nym jot lane duh noh.
La sam ruh ïaki khusnam ha katei ka sngi haki jingïakop bapher bapher naduh ka Science Exhibition, ka jingïakop dro dur, ïatyrko ktieng bad kiwei kiwei da ka syrnod bad kumjuh ruh ka khusnam pisa sha ki skul bapher bapher kiba la wan ban shim bynta.
