Nongpoh, Nailar, 12: Ka ophis jong ka District AIDS Control Officer, Ri-Bhoi District mynta ka sngi ka la rakhe ïa ka International Youth Day bad ha kajuh ka por ban pynbna ruh ïa ki jingïalap sha ki samla pule kum ka jingtip, ka jinghikai, ka jingpynïadei ne ka IEC Campaign ha kaba ïadei bad ka jingpang HIV/AIDS kaba la kynrei bha ha kane ka jylla jong ngi bad ha ka district, kumba ki samla ki don ka bynta kaba khraw halor katei ka bynta.
Ïa katei ka prokram la sdang shuwa da ka jingïaid rally ryngkat ki plakad ha surok bah National Highway naduh Pahamsyiem bad pynkut pat da ka jingïalang ha Ri-Bhoi College ba la shim bynta da ki samla pule bad kumjuh ruh ki nongtrei ka tnad ka koit ka khiah halor ka phang ki samla kum ki nongsdang ha ka jingïakhun pyrshah ïa ka jingpang HIV/AIDS.
Na ka liang u Abhilash Baranwal, Deputy Commissioner ka Ri-Bhoi u la leit ban shim bynta kum u kongsan ha katei ka sngi ha ka jingdonlang ka Dr E Kalwing District AIDS Control Officer, Ri-Bhoi District, ka Kong E Kharkongor Principal ka Ri-Bhoi College ki samla pule lem bad ki nongtrei ka koit ka khiah.
Haba kren ha katei ka sngi na ka liang ka Dr E Kalwing ka la banjur halor kumno ki samla kin long ki nongsdang ha ka jingïakhun pyrshah ïa ka jingpang HIV/AIDS namar ki don ka bynta kaba khraw ban long ki nongsam jingtip, ki nonghikai bad kumjuh ban long kiba phikir ha ka lynti ïaid ban lait na katei ka jait jingpang kaba la sdang ban kynrei ha ka jylla jong ngi.
U DC ka Ri-Bhoi u Abhilash Baranwal u la kyrpad ïa ki samla pule ha katei ka sngi ban kiar na ka jingpyndonkam ïa u drok da kaba injek da u juh u thyrñia bad ka shongkha khleh pathar namar kane kan wanrah ïa ka jingsaphriang jong katei ka jait jingpang, kumta na ka liang u DC u la kyrpad ïa ki khun samla ba ki dei ban long ka jingshai sha ka imlang ka sahlang ban ka imlang ka sahlang jong ngi kan lait na ka jingpang HIV AIDS.
